ملير: شاهه لطيف ٽائون ۾ قتل ٿيل نوجوان جي وارثن جو احتجاج

2مهينا اڳ نوجوان کي قتل ڪيو ويو، جوابدار ڌر رات جو گهر تي حملو ڪيو: مظاهرين

ملير (رپورٽ: عبدالرشيد مورجھريو): شاھ لطيف ٽائون ۾ ٻه مهينا اڳ گهر اندر قتل ٿيل نوجوان نوردين ممداڻي جي وارثن اڪرم ممداڻي، محمد علي ممداڻي ۽ ٻين جي اڳواڻي ۾ گهر تي مبينا حملي ۽ ڪوڙو ڪيس داخل ٿيڻ خلاف عوامي پريس ڪلب ملير اڳيان احتجاجي مظاهرو ڪيو ويو ان موقعي تي ميڊيا سان ڳالهائيندي اڳواڻن چيو ته ٻه مهينا اڳ شاھ لطيف ٽائون جي علائقي 31-سي ۾ جوابدارن سندن گهر اندر داخل ٿي نوردين ممداڻي کي قتل ڪيو هو هنن الزام هنيو ته جڏهن قتل جو ڪيس داخل ڪرائڻ جي ڪوشش ڪئي وئي ته بااثر لينڊ گريبر حبيب راڄپر ۽ سجاد جوڻيجو جي چوڻ تي پوليس ڪيس داخل ڪرڻ کان انڪار ڪندي رهي جڏهن ته وڏي ڪوششن کانپوءِ چار ڏينهن دير سان ايف آءِ آر داخل ڪئي وئي هنن چيو ته هاڻي ثابت ٿي ويو آهي ته نوردين ممداڻي جي قتل ۾ حبيب راڄپر ۽ سجاد جوڻيجو ملوث آهن احتجاج ڪندڙن وڌيڪ الزام هنيو ته گذريل رات ٽين وڳي حبيب راڄپر ۽ سجاد جوڻيجو پنهنجي ساٿين سان گڏ سندن گهر تي ٻيھر حملو ڪيو جنهن دوران پنهنجي مدد پاڻ تحت ٻن جوابدارن، اصغر شر ۽ هڪ اڻڄاتل شخص کي پڪڙي پوليس حوالي ڪيو ويو جڏهن ته حبيب راڄپر ۽ سندس ٻيا ساٿي فائرنگ ڪندا فرار ٿي ويا هنن چيو ته پوليس جوابدارن خلاف ڪيس داخل ڪرڻ بدران فريادي ڌر جي ٽن ڄڻن ھدايت الله، حضور بخش، فھد علي ۽ ڪجهه اڻڄاتل ماڻهن خلاف جڙتو ايف آءِ آر داخل ڪري قانون ۽ انصاف جو جنازو ڪڍي ڇڏيو آهي ھنن سنڌ جي وڏي وزير، آءِ جي سنڌ ۽ ايس ايس پي ملير کان مطالبو ڪيو ته واقعي جي شفاف جاچ ڪرائي نوردين ممداڻي جي قتل ڪيس ۾ حبيب راڄپر ۽ سجاد جوڻيجو کي شامل ڪيو وڃي ۽ فريادي ڌر خلاف داخل ڪيل جڙتو ايف آءِ آر ختم ڪري اسان سان انصاف ڪيو وڃي