وومين واريئرز فٽسل ليگ، دلچسپ مقابلا، ديا فٽبال اڪيڊمي ٽورنامينٽ کٽي ورتو

مستقبل ۾ به عورتن لاءِ وڌيڪ معياري ۽ بامقصد راندين جون سرگرميون باقاعدي منعقد ڪيون وينديون: منتظمن

ڪراچي(اسپورٽس نيوز)ويمن اسپورٽس فورم ۽ چارٽر فار ڪمپيشن جي گڏيل سهڪار سان وومين واريئرز فٽسل ليگ 2026 جي ڪامياب انعقاد 20 جون 2026ع تي برج اسپورٽس ارينا، قيوم آباد، ڪراچي ۾ ڪئي وئي. هن ايونٽ ۾ ڪراچي جي مختلف علائقن مان تعلق رکندڙ ڇهن ٽيمن شرڪت ڪئي، جن ۾ اوورسيز ايف سي، لياري فٽبال اڪيڊمي، ديا فٽبال اڪيڊمي، نيور اليونز، شي پليز ايف سي ۽ گرين يونائيٽيڊ ايف سي شامل هيون. سڀني ٽيمن شاندار راند، نظم ۽ ضبط ۽ بهترين اسپورٽس مين شپ جو مظاهرو ڪيو. تقريب جون معزز مهمان مس سمرين عارف (مينيجر پروگرام، چارٽر فار ڪمپيشن) ۽ ڊاڪٽر سعديه شيخ (مدر آف ويمن فٽبال ٽيم ۽ هيڊ ڪوچ، ديا فٽبال اڪيڊمي) هيون، جن رانديگرن جي همت افزائي ڪئي ۽ عورتن جي راندين جي واڌاري لاءِ اهڙين سرگرمين جي اهميت کي اجاگر ڪيو. سخت ۽ دلچسپ مقابلن کانپوءِ ديا فٽبال اڪيڊمي ٽورنامينٽ جو ٽائيٽل پنهنجي نالي ڪيو، جڏهن ته لياري فٽبال اڪيڊمي رنر اپ رهي. انفرادي ڪارڪردگي جي اعزازن ۾ عمره (لياري فٽبال اڪيڊمي) ۽ حرمين (ديا فٽبال اڪيڊمي) کي شاندار ڪارڪردگي تي خصوصي ايوارڊ ڏنا ويا. معزز مهمانن ڪامياب ٽيمن ۽ نمايان رانديگرن ۾ ٽرافيون، ميڊل ۽ اعزازي سندون ورهايون. ان موقعي تي عورتن جي فٽبال جي واڌاري، نوجوان نياڻين کي راندين جي ميدان ۾ اڳتي وڌڻ جا موقعا فراهم ڪرڻ ۽ صحتمند سماج جي تعمير ۾ راندين جي اهم ڪردار تي پڻ روشني وڌي وئي. آخر ۾ ويمن اسپورٽس فورم طرفان چارٽر فار ڪمپيشن، معزز مهمانن، سڀني شريڪ ٽيمن، ڪوچز، والدين، رضاڪارن ۽ اسپورٽس ارينا جي انتظاميا جا ٿورا مڃيا ويا، جن جي سهڪار ۽ شرڪت سان ويمن واريئرز فٽسل ليگ 2026ڪاميابي سان منعقد ٿي. منتظمن ان عزم جو اظهار ڪيو ته مستقبل ۾ به عورتن لاءِ وڌيڪ معياري ۽ بامقصد راندين جون سرگرميون باقاعدي منعقد ڪيون وينديون.