گڏاپ ٽائون جي 4 ارب 4 ڪروڙ 22 لک رپين جي بجيٽ منظور

گڏاپ ٽائون جي چيئرمين طارق عزيز بلوچ جي صدارت هيٺ بجيٽ بابت اجلاس ٿيو

ملير (رپورٽ: عبدالرشيد مورجھريو) گڏاپ ٽائون جي چيئرمين طارق عزيز بلوچ جي صدارت هيٺ مالي سال 2026-27ع جي بجيٽ بابت خصوصي اجلاس ٿيو جنهن دوران شهيد اڳواڻ بينظير ڀٽو شهيد جي 73هين سالگرهه جي موقعي تي سندس درجات جي بلندي لاءِ خصوصي دعا پڻ گهري وئي ان موقعي تي فنانس ڪميٽي جي چيئرمين محمد رفيق جوکيو مالي سال 2026-27ع جي بجيٽ جا تفصيل پيش ڪندي ٻڌايو ته ٽائون جو مجموعي بجيٽ 4 ارب 4 ڪروڙ 22 لک رپيا مقرر ڪيو ويو آهي، جنهن ۾ OZT فنڊز سميت ٽائون جي آمدني جا ٻيا ذريعا شامل آهن هن ٻڌايو ته بجيٽ ۾ غير ترقياتي خرچن، ملازمن جي پگهارن، مرمت ۽ سار سنڀال، متفرق خرچن سان گڏ هلندڙ ترقياتي منصوبن، واٽر سپلاءِ اسڪيمن، نيڪالِ آب جي منصوبن، روڊن جي تعمير ۽ مرمت، پارڪن جي بحالي، فلاحي منصوبن ۽ ٻين عوامي سهولتن لاءِ خصوصي فنڊ مختص ڪيا ويا آهن. اجلاس دوران ڪائونسل جي ميمبرن بجيٽ تي تفصيلي بحث ڪندي مختلف تجويزون پيش ڪيون. پارلياماني ليڊر مير عباس ٽالپر، پي ايس 85 جي صدر مرتضيٰ يار محمد بلوچ، پي ايس 85 جي جنرل سيڪريٽري عبدالستار جوکيو سميت دادا ڪريم بلوچ، امن دين جوکيو، سليم ميمڻ، علي محمد گبول، عيسيٰ بلوچ، دانش برفت ۽ سني عاشق مسيح بجيٽ بابت پنهنجا خيال پيش ڪيابعد ۾ بجيٽ کي اڪثريتي راءِ سان منظور ڪيو ويو. ان موقعي تي چيئرمين طارق عزيز بلوچ چيو ته هن بجيٽ ۾ گڊاپ ٽائون جي ترقي ۽ شهرين کي بهتر بلدياتي سهولتون فراهم ڪرڻ کي اولين ترجيح ڏني وئي آهي. هن چيو ته اسٽريٽ لائيٽن، صفائي سٿرائي، صحت عامه ۽ بنيادي ڍانچي جي بهتري لاءِ اثرائتا قدم کنيا پيا وڃن ۽ مستقبل ۾ به وڌيڪ ترقياتي ڪم جاري رکيا ويندا. هن وڌيڪ چيو ته طاقت جو اصل سرچشمو عوام آهن ۽ سندن سهڪار کان سواءِ ڪو به ادارو ڪاميابي حاصل نٿو ڪري سگهي.