نوشهروفيروز ۾ پسند جو پرڻو ڪندڙ جوڙي جو احتجاج

خيرپورواسڻ بينظير پهل ۽ دريا خان واسي نثار مري احتجاج ڪيو

نوشهروفيروز (ڊ ر)پسند جي شادي ڪندڙ جوڙي جو تحفظ فراهم ڪرڻ جو مطالبو، درياخان جي رهواسي نثار احمد مري ۽ پير وسن، ضلعي خيرپور جي رهواسڻ بينظير پهل نوشهروفيروز جي عدالت ۾ پسند جي شادي ڪري ورتي. پسند جي شادي ڪندڙ جوڙو بعد ۾ پريس ڪلب نوشهروفيروز پهچي ميڊيا سان ڳالهائيندي پنهنجي تحفظ جو مطالبو ڪيو. ان موقعي تي نثار احمد مري ۽ بينظير پهل چيو ته هنن شريعت محمدي موجب عدالت ۾ قانوني طور نڪاح ڪيو آهي. بينظير پهل ٻڌايو ته سندس اڳ ۾ سرمد پهل سان شادي ٿيل هئي، جنهن بعد کيس طلاق ملي، جنهن کانپوءِ هنن پاڻ ۾ شريعت موجب شادي ڪئي آهي. جوڙي الزام هنيو ته سندن مائٽ، جن ۾ علي مراد مري، سليمان پهل، گلن پهل ۽ ٻيا شامل آهن، سندن جان جا دشمن بڻجي ويا آهن ۽ کين قتل جون ڌمڪيون ڏئي رهيا آهن. هنن سنڌ جي وڏي وزير، گهرو وزير، آءِ جي پوليس ۽ ٻين لاڳاپيل اختيارين کي اپيل ڪئي ته سندن جان ۽ مال جو تحفظ يقيني بڻايو وڃي ته جيئن هو بنا خوف جي پنهنجي زندگي گذاري سگهن.