هڱورجا ۾ آءِ بي اي ٽيسٽ پاس اميدوارن جو آفر آرڊر نه ملڻ خلاف احتجاج

غضنفر سولنگي، گلزار اوٺو، اسلم چنو، عدنان مغل ۽ عبدالقادر شيخ ۽ ٻين اڳواڻي ڪئي

هڱورجا(رپورٽر) آءِ بي اي ٽيسٽ پاس 40 پلس اميدوارن جو آفر آرڊر نه ملڻ خلاف احتجاج، ڌرڻو، حڪومت کان فوري نوڪرين جو مطالبو.تفصيل موجب تعلقي سوڀوديرو سان تعلق رکندڙ آءِ بي اي ٽيسٽ پاس 40 پلس پي ايس ٽي (PST) ۽ جي ايس ٽي (JST) اميدوارن پاران آفر آرڊر جاري نه ٿيڻ خلاف هنڱورجا پريس ڪلب آڏو احتجاجي مظاهرو ڪري ڌرڻو هنيوويو.احتجاجي مظاهري جي اڳواڻي غضنفر سولنگي، گلزار اوٺو، اسلم چنو، عدنان مغل ۽ عبدالقادر شيخ ڪئي، جڏهن ته وڏي انگ ۾ اميدوارن شرڪت ڪئي. احتجاج ڪندڙن هٿن ۾ پلي ڪارڊ ۽ بينر کنيل هئا، جن تي حڪومت کان آفر آرڊر جاري ڪرڻ جا مطالبا درج هئا.ان موقعي تي ميڊيا سان ڳالهائيندي اڳواڻن چيو ته هنن آءِ بي اي جو ٽيسٽ ميرٽ تي ڪاميابي سان پاس ڪيو، پر ان باوجود کين پي ايس ٽي ۽ جي ايس ٽي جون آفرون جاري نه ڪيون پيون وڃن، جيڪا سندن حقن سان کليل ناانصافي آهي. هنن چيو ته حڪومت ميرٽ تي ڀرتين جا واعدا ڪيا هئا، پر اڃا تائين انهن واعدن تي عمل نه ڪيو ويو آهي، جنهن سبب سوين ٽيسٽ پاس اميدوار سخت ذهني پريشاني ۽ بيچيني جو شڪار آهن.احتجاج ڪندڙن وڌيڪ چيو ته کين روزگار جي اميد هئي، پر آفر آرڊر نه ملڻ سبب سندن مستقبل داءُ تي لڳل آهي. هنن حڪومت، تعليم کاتي ۽ لاڳاپيل اختيارين کان مطالبو ڪيو ته ٽيسٽ پاس سمورن اهل اميدوارن کي بنا دير آفر آرڊر جاري ڪري کين روزگار فراهم ڪيو وڃي.هنن خبردار ڪيو تہ جيڪڏهن سندن جائز مطالبا فوري طور تي تسليم نه ڪيا ويا ته احتجاج جو دائرو وڌايو ويندو ۽ سڄي صوبي ۾ سخت احتجاجي تحريڪ هلائي ويندي، جنهن جي سموري ذميواري حڪومت ۽ لاڳاپيل اختيارين تي هوندي.