مڪلي سول اسپتال جي بجلي بند، مريضن جي شڪايتن جو ڊي سي ٺٽو نوٽيس ورتو

ڊي سي سرمد علي ڀاڳت ٽيم سان گڏ اسپتال پهچي بجلي بحال ڪرائي ڇڏي

ٺٽو( محمد شفيق ڀٽي)ڊپٽي ڪمشنر ٺٽو سرمد علي ڀاڳت سول اسپتال مڪلي ۾ بجلي جي بريڪ ڊائون ۽ جنريٽر غيرفعال ٿيڻ سبب ايمرجنسي خدمتن جي متاثر ٿيڻ بابت شڪايتن جو فوري ۽ سخت نوٽيس وٺندي پنهنجي ٽيم سان گڏ اسپتال جو اوچتو دورو ڪيو.هن موقعي تي پهچي لاڳاپيل عملي جي سهڪار سان بجلي جي فراهمي فوري طور بحال ڪرائي ۽ اسپتال انتظاميه کي هدايت ڪئي ته مستقبل ۾ اهڙن واقعن کان بچڻ لاءِ مؤثر متبادل انتظام يقيني بڻايا وڃن.ڊپٽي ڪمشنر اسپتال جي مختلف شعبن جو تفصيلي معائنو ڪيو ، ڊاڪٽرن ۽ ٻين طبي عملي جي حاضري چيڪ ڪئي ، مريضن سان ملاقات ڪري کين فراهم ڪيل طبي سهولتن بابت ڄاڻ ورتي ۽ مجموعي صورتحال جو جائزو ورتو.ان موقعي تي ميڊيا سان ڳالهائيندي سرمد علي ڀاڳت چيو ته اسپتال ۾ بجلي جي عدم فراهمي سڌو سنئون مريضن جي جانين لاءِ خطرو بڻجي سگهي ٿي، تنهنڪري هن معاملي ۾ ڪنهن به قسم جي غفلت يا لاپرواهي هرگز برداشت نه ڪئي ويندي.هن چيو ته اسپتال ۾ بجلي ، جنريٽر ۽ ٻين انتظامي معاملن بابت مليل شڪايتن جو تفصيلي جائزو ورتو پيو وڃي ۽ ان سلسلي ۾ هڪ جامع رپورٽ تيار ڪري صحت کاتي جي اعليٰ اختيارين ڏانهن اماڻي ويندي.هن سول سرجن، ڊاڪٽرن ۽ مرف انتظاميه کي هدايت ڪئي ته نظم ۽ ضبط ، عملي جي حاضري ۽ عوام کي معياري طبي سهولتن جي فراهمي هر صورت ۾ يقيني بڻائي وڃي.ڊپٽي ڪمشنر واضح ڪيو ته سول اسپتال سميت ضلعي جي سمورن سرڪاري ادارن جا اوچتا دورا باقاعدي جاري رهندا. هن چيو ته هو پاڻ به ذاتي طور نگراني ڪندو ۽ هڪ هفتي کانپوءِ ٻيهر اسپتال جو دورو ڪري مسئلن جي حل ۽ جاري ڪيل هدايتن تي عملدرآمد جو جائزو وٺندو.هن ان عزم جو اظهار ڪيو ته ضلعي انتظاميه عوام کي بهتر طبي سهولتون فراهم ڪرڻ ۽ سرڪاري ادارن جي ڪارڪردگي ۾ وڌيڪ بهتري آڻڻ لاءِ هر ممڪن قدم کڻندي رهندي.