قائد آباد ۾ گهر مالڪن جو ڪرائيدارن تي ڇرين سان حملو، 2نوجوان زخمي

هزاره برادري سان تعلق رکندڙ گهر مالڪن ۽ سنجراڻي برادري سان واسطو رکندڙ ڪرائيدارن وچ ۾ معمولي ڳالهه تان تڪرار ٿيو

ملير (رپورٽ: عبدالرشيد مورجھريو) ملير جي علائقي شير پاؤ، قائد آباد ٿاڻي جي حد ۾ پيش آيل هڪ افسوسناڪ واقعي ۾ گهر جي مالڪن پاران پنهنجن ڪرائيدارن تي مبينا طور ڇرين سان حملو ڪيو ويو، جنهن جي نتيجي ۾ ٻه نوجوان سخت زخمي ٿي پيا۔ تفصيلن موجب هزاره برادري سان تعلق رکندڙ گهر مالڪن ۽ سنجراڻي برادري سان واسطو رکندڙ ڪرائيدارن وچ ۾ معمولي ڳالهه تان تڪرار شدت اختيار ڪري ويو، جنهن دوران مالڪن مبينا طور گهر اندر گهڙي ڪرائيدارن تي ڇرين جا وار ڪيا۔ حملي جي نتيجي ۾ سرفراز سنجراڻي ۽ نويد سنجراڻي سخت زخمي ٿي پيا، جن کي فوري طور جناح اسپتال منتقل ڪيو ويو۔ اسپتال ذريعن موجب نويد سنجراڻي جي حالت ڳڻتي جوڳي ٻڌائي پئي وڃي، جنهن جو هڪ آپريشن ٿي چڪو آهي، جڏهن ته وڌيڪ علاج لاءِ ٻيو آپريشن به متوقع آهي۔ واقعي کانپوءِ جوابدار گهر ڇڏي فرار ٿي ويا آهن، جڏهن ته پوليس ڪيس داخل ڪري جاچ شروع ڪري ڇڏي آهي۔ پوليس موجب جوابدارن جي گرفتاري لاءِ ڪارروائي جاري آهي ۽ جلد کين گرفتار ڪيو ويندو۔ ٻئي پاسي عوامي راڄ تحريڪ جي اڳواڻن ۽ مقامي ماڻهن زخمين جي عيادت ڪندي واقعي جي مذمت ڪئي آهي ۽ مطالبو ڪيو آهي ته ملوث جوابدارن کي فوري طور گرفتار ڪري سخت قانوني ڪارروائي ڪئي وڃي۔