ملير: عبدالروف بلوچ جي ياد ۾ تعزيتي اجلاس، اڳواڻن طرفان ڀرپور خراج عقيدت

عبدالروف بلوچ هڪ متحرڪ ۽ سرگرم سياسي ڪارڪن هو۔ ذاتي طور تي سٺو، مخلص ۽ مهمان نواز انسان هو: مقرر

ملير (رپورٽ: عبدالرشيد مورجھريو) منصور حلاج فائونڊيشن جي انتظام هيٺ عوامي پريس ڪلب ملير، مومن مليرآئي لائبريري ۾ معروف سياسي ۽ سماجي اڳواڻ مرحوم عبدالروف بلوچ جي ياد ۾ تعزيتي اجلاس منعقد ڪيو ويو، جنهن ۾ سياسي، سماجي اڳواڻن ۽ صحافين وڏي انگ ۾ شرڪت ڪئي۔اجلاس کي خطاب ڪندي مهمانِ خاص نذير چنا چيو ته عبدالروف بلوچ هڪ متحرڪ ۽ سرگرم سياسي ڪارڪن هو۔ هن جي سوچ ۽ عمل سان اختلاف ٿي سگهي ٿو، پر هو ذاتي طور تي هڪ سٺو، مخلص ۽ مهمان نواز انسان هو۔ هن چيو ته مرحوم جون خدمتون هميشه ياد رکيون وينديون۔ان موقعي تي ايڊووڪيٽ نسيم شاهه، جبار خاصخيلي، سامي ميمڻ ۽ عنايت شاهه خطاب ڪندي چيو ته عبدالروف بلوچ پنهنجي سڄي زندگي عوامي خدمت لاءِ وقف ڪري ڇڏي هئي۔ هو هڪ بهادر ۽ اصول پسند شخصيت جو مالڪ هو، جنهن هميشه سچ ۽ حق جو ساٿ ڏنو۔ مقررِين چيو ته مرحوم جي کوٽ هميشه محسوس ڪئي ويندي ۽ سندس خدمتون اسان لاءِ مشعلِ راهه آهن۔آخر ۾ مرحوم عبدالروف بلوچ جي ايصالِ ثواب لاءِ دعا گهري وئي ۽ الله تعاليٰ کان سندس درجات بلندي لاءِ خاص دعا ڪئي وئي۔