ملير: رينجرز جي ڪارروائي، لالو گروھ جا 2 جوابدار گرفتار

ملير (رپورٽ: عبدالرشيد مورجھريو) ڪراچي ملير ۾ پاڪستان رينجرز (سنڌ) خفيه ڄاڻ جي بنياد تي ڪارروائي ڪندي سُکڻ جي علائقي لالا آباد مان ڦر ۽ اسٽريٽ ڪرائم جي ڪيترين ئي وارداتن ۾ ملوث "لالو گروھ" سان واسطو رکندڙ ٻن جوابدارن کي گرفتار ڪري ورتو۔ترجمان موجب گرفتار جوابدارن ۾ حميدالله عرف مانو ولد موسيٰ ۽ فريد الله ولد شير زمان شامل آهن۔ جوابدارن جي قبضي مان 30 بور جو هڪ پسٽل بمعه ميگزين ۽ 15 گوليون، هڪ پائوچ ۽ ٻه موبائل فون برآمد ڪيا ويا۔ابتدائي جاچ موجب جوابدار پنهنجن ٻين ساٿين سان گڏ قائدآبا ڪورنگي، لالا آباد ۽ ڀرپاسي وارن علائقن ۾ ڦر ۽ موبائل فون کسڻ جي ڪيترين ئي وارداتن ۾ ملوث رهيا آهن۔رينجرز اختيارين موجب گرفتار جوابدار حميدالله اسٽريٽ ڪرائم کان علاوه ڊيزل اسمگلنگ ۾ به ملوث رهيو آهي ۽ هو ان کان اڳ به گرفتار ٿي جيل وڃي چڪو آهي، جڏهن ته سندس خلاف ڪراچي جي مختلف ٿاڻن تي ڪيترائي ڪيس داخل آهن۔اختيارين موجب جوابدارن جي ٻين ساٿين جي گرفتاري لاءِ ڇاپا هنيا پيا وڃن، جڏهن ته گرفتار جوابدارن کي برآمد ٿيل سامان سميت وڌيڪ قانوني ڪارروائي لاءِ پوليس حوالي ڪيو ويو آهي۔