نوشھروفيروز ۾ اين سي ايڇ ڊي جي استادن پاران پگهارون نه ملڻ ۽ مستقل نه ڪرڻ خلاف احتجاج

نوشھروفيروز(ڊ ر)اين سي ايڇ ڊي جي استادن پاران ٽن مهينن کان پگهارون نه ملڻ، ريگيولر نه ڪرڻ ۽ ٻين مطالبن جي مڃتا لاءِ انصاف چوڪ کان پريس ڪلب نوشھرو فيروز تائين احتجاجي ريلي ڪڍي وئي۔تفصيل موجب اين سي ايڇ ڊي جي استادن مبين احمد راڄپر، خان محمد ملاح، واحد بخش، محبت سولنگي ۽ ٻين جي اڳواڻي ۾ پريس ڪلب نوشھرو فيروز آڏو احتجاجي مظاهرو ڪيو۔ استادن پنهنجي مطالبن بابت ٻڌائيندي چيو ته کين 22 سالن جي سروس ڪندڙ پرائمري ٽيچرن جهڙيون سهولتون ڏئي ريگيولر ڪيو وڃي۔ هنن چيو ته استادن سان ڪيل واعدي موجب بارڪوڊ ڊيٽابيس اي جي سنڌ ڏانهن موڪلي سندن آءِ ڊيز جاري ڪيون وڃن۔ اين سي ايڇ ڊي بيڪس استادن جي عمر جي حد 55 سالن بدران سروس رول موجب 60 سال مقرر ڪئي وڃي ۽ ناانصافي جي بنياد تي ٿيل جبري بدليون واپس ورتيون وڃن۔ استادن وڌيڪ مطالبو ڪيو ته ٽن مهينن کان رهيل پگهارون عيدالاضحيٰ کان اڳ جاري ڪيون وڃن ۽ استادن خلاف انتقامي ڪارروائيون ڪندڙ سيڪشن آفيسر عبدالستار ملڪ کي هٽايو وڃي۔ هنن خبردار ڪيو ته جيڪڏهن سندن مطالبا منظور نه ڪيا ويا ته فيڊر ٽيچرس ايسوسيئيشن اين سي ايڇ ڊي ضلع نوشھرو فيروز پاران تحريڪ هلائي ويندي، جنهن جي ذميواري انتظاميه تي عائد ٿيندي۔