عمرڪوٽ ۾ بيواهه عورت جو معصوم ٻارڙن سميت احتجاج

ڀوڄو ڪولهي لاباري لاءِ لاڙڪاڻي وٺي ويو هو، 30 مڻ ڪڻڪ کڻيو ويو آهي: سومري ڪولهي

عمرڪوٽ (رپورٽ:ڪانجي مل رکيسر) عمرڪوٽ پريس ڪلب آڏو هڪ بيواه عورت سومري ڪولهڻ پنهنجي معصوم ٻارن سميت ليبر جمعدار خلاف احتجاجي مظاهرو ڪيو، متاثر عورت الزام لڳائيندي چيو ته ليبر جمعدار ڀوڄو ڪولهي کين ڪڻڪ جي لاٻاري لاءِ لاڙڪاڻي وٺي ويو، جتي هنن سخت گرمي ۽ ڏکين حالتن باوجود ڏينهن رات محنت ڪري ڪڻڪ گڏ ڪئي، پر هاڻي کين نه مزدوري جا پئسا ڏنا پيا وڃن ۽ نه ئي سندن حصي جي ڪڻڪ واپس ڪئي پئي وڃي، احتجاج دوران متاثر عورت صحافين سان ڳالهائيندي ٻڌايو ته هن پنهنجي ٻارن جي پيٽ پالڻ لاءِ ٻين مزدورن سان گڏ محنت ڪئي هئي ۽ لاٻاري دوران گڏ ڪيل سندن 30 مڻ ڪڻڪ به ڀوڄو ڪولهي ۽ ڀيرو ڪولهي مبينه طور کڻي ويا آهن، هن وڌيڪَ الزام هنيو ته جڏهن به هو پنهنجي حق جي ڪڻڪ يا مزدوري طلب ڪن ٿا ته کين موتمار ڌمڪيون ڏئي خاموش ڪرائڻ جي ڪوشش ڪئي وڃي ٿي، بيواه عورت چيو ته هوءَ انتهائي غريب ۽ لاچار آهي، گهر ۾ ڪمائڻ وارو ٻيو ڪو به فرد موجود ناهي، سندس معصوم ٻار به سندس ئي آسري تي آهن، هن وس وارن، ضلعي انتظاميه ۽ لاڳاپيل اختيارين کان پرزور مطالبو ڪيو ته سندس لاٻاري جي مزدوري جا پئسا، 30 مڻ ڪڻڪ واپس ڪرائي کيس تحفظ ۽ انصاف فراهم ڪيو وڃي، جيئن سندس معصوم ٻارن جو گذر سفر ٿي سگهي، احتجاج دوران بيواه عورت ۽ سندس معصوم ٻارن هٿن ۾ پلي ڪارڊ کڻي انصاف لاءِ نعريبازي پڻ ڪئي.