گڏاپ ۾ ڌرم داس جي گهر تي ڌاڙي خلاف ابراهيم حيدري ۾ احتجاج

ملير (رپورٽ: عبدالرشيد مورجھريو)گڏاپ ۾ شهري ڌرم داس جي گهر ۾ ٿيل هٿياربند ڌاڙي خلاف ابراهيم حيدري ۾ اقليتي برادري ۽ علائقي واسين پاران احتجاجي مظاهرو ڪيو ويو. مظاهرين وڏي تعداد ۾ شرڪت ڪري سخت نعريبازي ڪئي ۽ مطالبو ڪيو ته ڌاڙي ۾ ملوث جوابدارن کي فوري طور گرفتار ڪري ڦر ٿيل سون، روڪ رقم ۽ ٻيو قيمتي سامان هٿ ڪري متاثر خاندان کي واپس ڪيو وڃي.احتجاج جي اڳواڻي اقليتي برادري جي معزز اڳواڻ ۽ ڪائونسلر مکي اوڌا مل سميت ٻين سماجي اڳواڻن ڪئي. ان موقعي تي ڳالهائيندي مکي اوڌا مل چيو ته گڏاپ ۾ ٿيل ڌاڙو قانون لاڳو ڪندڙ ادارن جي ڪارڪردگي تي وڏو سوال آهي. هن ٻڌايو ته واقعي کانپوءِ پيپلز پارٽي جي چونڊيل نمائندن سان گڏ آءِ جي سنڌ سان پڻ ملاقات ڪئي وئي، جتي جوابدارن جي جلد گرفتاري جي خاطري ڪرائي وئي، پر افسوس جو اڃا تائين ڪا به عملي اڳڀرائي نظر نه آئي آهي هن چيو ته افسوس جي ڳالهه آهي جو هٿياربند ڦورو ڏينهن ڏٺي شهري جي گهر ۾ داخل ٿي گهر ڀاتين کي يرغمال بڻايو، عورتن ۽ ٻارن کي تشدد جو نشانو بڻايو ۽ ڪروڙين روپين جي ماليت جو سون، روڪ رقم ۽ ٻيو قيمتي سامان ڦري آساني سان فرار ٿي ويا، جڏهن ته پوليس وقت سر نه پهتي مظاهرين چيو ته جيڪڏهن جوابدار جلد گرفتار نه ڪيا ويا ۽ ڦر ٿيل مال برآمد نه ڪيو ويو ته احتجاج جو دائرو وڌايو ويندو ۽ اعليٰ اختيارين جي آفيسن آڏو ڌرڻا هنيا ويندا. هنن سنڌ حڪومت، آءِ جي سنڌ ۽ ايس ايس پي ملير کان مطالبو ڪيو ته واقعي ۾ ملوث سمورن جوابدارن کي قانون جي ڪٽهڙي ۾ آڻي متاثر خاندان کي انصاف فراهم ڪيو وڃي ته جيئن علائقي ۾ وڌندڙ بدامني تي ضابطو آڻي سگهجي.