2مھينا اڳ اغوا ٿيل اڳوڻو ڊائريڪٽر ايڪسائيز سعيد ميمڻ ڪوئيٽا مان بازياب، سندس حالت خراب ھجڻ سبب اسپتال منتقل

نوشهرو فيروز(ڊر) بلوچستان مان اغوا ڪيل اڳوڻو ڊائريڪٽر ايڪسائيز، نارڪوٽيڪس، اديب ۽ دانشور سعيد احمد ميمڻ ٻن مهينن کان پوءِ انتهائي خراب حالت ۾ ڪوئيٽا مان بازياب ٿي ويو آهي، سندس طبيعت ۾ شديد ڪمزوري ۽ ذهني صدمَي جي حالت ڪري کيس مختلف طبي تڪليفن، جسماني ڪمزوري ۽ اغوا دوران پيش آيل ذهني اثرن کي ختم ڪرڻ لاءِ کيس هڪ نجي اسپتال ۾ علاج هيٺ رکيو ويو آهي ۽ گهر جي ڪجھ ڀاتين سان هو مليو آهي، باقي ٻين مِٽن مائٽن، دوستن، احبابن سان جلد صحتياب ٿيڻ کان پوءِ ملندو. واضح رهي ته سندس دل جا اڳ ئي ٻه آپريشن ٿيل آهن، سندس بازيابي لاءِ پوري سنڌ ۾ احتجاج ٿيا هئا، سندس خاندان سنڌ، بلوچستان ۽ دنيا جي انهن سڀني انساني حقن جي ڪارڪنن، سماجي ۽ سياسي اڳواڻن، وڪيلن، صحافين، اديبن، شاعرن، سول سوسائٽي، ۽ هر اُن انسان جا دل جي گهرائين سان ٿورا مڃيا آهن جن سعيد ميمڻ جي محفوظ بازيابيءَ لاءِ آواز بلند ڪيو، دعائون ڪيون، لِکيو، ڳالهايو ۽ ساٿ ڏنو.