عمرڪوٽ ۾ اُرڙي وگھي ڀاءُ ۽ ڀيڻ فوت، گھر ۾ ڪھرام متل

ڳوٺ هوتو ڪولهي ۾ روپو ڪولھي جي ڌيءَ سنيتا ۽ پٽ گلاب فوت

عمرڪوٽ (رپورٽ:ڪانجي مل رکيسر) ضلعي عمرڪوٽ ۾ ارڙي (خسري) جي وبا شدت اختيار ڪندي ٻن معصوم ٻارڙن جون حياتيون ڳڙڪائي ويون، ڳوٺ هوتو ڪولهي جا رهواسي ڀاءُ ۽ ڀيڻ، 6 ورهين جي سنيتا ڌيءَ روپو ڪولهي ۽ 3 ورهين جي گلاب پٽ روپو ڪولهي، ارڙي جي وبا ۾ مبتلا ٿيڻ بعد فوت ٿي ويا، ٻنهي ٻارڙن جي فوت ٿيڻ جي خبر ملندي ئي علائقي ۾ سوڳ جي لهر ڇانئجي وئي، جڏهن ته وارثن ۽ ڳوٺاڻن سخت ڏک ۽ افسوس جو اظهار ڪيو، علائقي واسين جو چوڻ آهي ته ارڙي جي وبا تيزي سان پکڙجي رهي آهي، تنهن ڪري صحت کاتي کي فوري طور متاثر علائقن ۾ طبي ٽيمون موڪلي، ٻارن جي ويڪسينيشن، علاج ۽ حفاظتي اپائن کي يقيني بڻائڻ گهرجي ته جيئن وڌيڪَ قيمتي جاني نقصان کان بچي سگهجي، هوڏانهن شهرين حڪومت ۽ لاڳاپيل اختيارين کان مطالبو ڪيو آهي ته ارڙي جي وبا تي ضابطو آڻڻ لاءِ هنگامي بنيادن تي قدم کنيا وڃن ۽ متاثر علائقن ۾ بهتر طبي سهولتون فراهم ڪيون وڃن.