ڏوڪريءَ ڀرسان معصوم نينگري پيدائشي گهمڻ ڦرڻ کان لاچار، والدين سخت پريشان

ڳوٺ دريا خان مڱريو واسڻ 7 ورهين جي سونيا ميمڻ جي وارثن کي ڪراچي جي آغا خان اسپتال مان علاج جو مشورو

ڏوڪري (اطهر ميمڻ) ڏوڪريءَ ڀرسان ڳوٺ دريا خان منڱريو جي رهواسڻ 7 ست سالا سونيا ميمڻ ڌي نثار احمد عرف عدن ميمڻ ڄائي ڄم کان وٺي گهمڻ ڦرڻ کان لاچار،ڊاڪٽرن پاران نياڻي جو آغا خان اسپتال ڪراچي مان علاج ڪرائڻ جو مشورو، غربت سبب سندس والدين ڪراچي مان علاج ڪرائڻ کان قاصر، سندس والدين اڄ به ڪنهن مسيحا جي اوسيئڙي ۾. تفصيل موجب ڏوڪري ڀرسان ڳوٺ دريا خان منڱريو جي 7 سالا نياڻي سونيا ميمڻ ڌيءَ نثار احمد عرف عدن ميمڻ ڄائي ڄم کان وٺي معذوري جي لپيٽ ۾ ويٺي زندگيءَ جا ڏينهن ڳڻي رت روئي رهي آهي ۽ پاڻ جيڏين نينگرين کي راند روند ۾ مشغول ڏسي کين حسرت مان نهاري واپس ڀانڀڙا پائي پنهنجي گهر ڪنڊ ۾ ويهي ڳوڙها ڳاڙي رهي آهي، ان موقعي تي سندس والد نثار احمد عرف عدن ميمڻ جو چوڻ هو ته مونکي رب پاڪ ٽن ٻچڙن سان نوازيو آهي منهنجي هيءَ ڌيءَ جنهن جي عمر 7 ست سال آهي جيڪا ڄائي ڄم کان معذور آهي اسان پنهنجي نياڻي سونيا جو وس آهر علاج به ڪرايو آهي هتان جا ڊاڪٽر آغا خان اسپتال ڪراچي مان نينگري جو علاج ڪرائڻ جو مشورو ڏئي رهيا آهن جڏهن ته مونکي ٻچڙن کي رهائڻ لاءِ پنهنجي جڳھ به نه آهي، هاڻي اسان کي اها مالي وصيت به ڪانهي جو پنهنجي معصوم گلن جهڙي نينگريءَ جو وڌيڪ علاج ڪرائي سگهون، تازو پيل برساتن ۾ منهنجو جڳهو ڊهي پٽ پئجي ويو آهي مونکي رهڻ لاءِ پنهنجي جڳھ به ناهي مائٽن وٽ تنبو هڻي رهيل آهيون، اسان کي اهو لمحو انتهائي ڏکوئيندڙ لڳندو آهي جڏهن پاڙي جا ننڍڙا ننڍڙا معصوم ٻارڙا هڪٻئي سان راند روند ڪندا آهن ۽ منهنجي معصوم نياڻي کين حسرت وچان ڏسندي دل برداشت ٿي معصوم حسرتن سان واپس گهر موٽندي آهي ۽ اڀ ڏانهن نهاري پنهنجون اکيون آليون ڪري ڪنڊائتي ويهندي آهي، اسين غريب نهايت مسڪين ماڻهون آهيون خدا کان سواءِ ڪو ٻيو مددگار نه آهي، اسان مسڪين ماڻهن جي وس وارن کي گذارش آهي ته خدارا اوهان به ٻچڙن وارا آهيو خدا ڪارڻ مون غريب جي نياڻي جي علاج لاءِ مون مسڪين جي مدد ڪريو خدا اوهان جي ٻچڙن کي شاد و آباد رکندو.