مڙني مسئلن کان نجات جو واحد حل ملڪ ۾ شفاف چونڊون آهن: محمد حسين محنتي

نگران سرڪار عوام مٿان مهانگائي جي بمباري ڪرڻ ۾ پي ٽي آءِ ۽ پي ڊي ايم سرڪار کي به مات ڏئي ڇڏي

ڪراچي/ٺٽو (اسٽاف رپورٽر) جماعت اسلامي جي امير ۽ اڳوڻي ايم اين اي محمد حسين محنتي چيو آهي ته نگران سرڪار آءِ ايم ايف جي تعبداري ۽ عوام مٿان مهانگائي جي بمباري ڪرڻ ۾ پي ٽي آءِ ۽ پي ڊي ايم سرڪار کي به مات ڏئي ڇڏي آهي، ڊالر جي اونچي اُڏام سميت اٽي، کنڊ، پيٽروليم مصنوعات ۽ بجلي سميت عام واهپي وارين شين جي اگهن ۾ ڳاٽي ٽوڙ اضافي عوام جي مشڪلات ۾ اضافو ۽ نگران حڪومت کان ڀلائي جي اُميدن تي پاڻي ڦيري ڇڏيو آهي، لڳي ٿو ته ملڪ ۾ نگران حڪومت پاڪستان جي نه بلڪه سڌو سنئون آءِ ايم ايف پاران مسلط ڪئي وئي جيڪا ملڪ ۾ بهتري بدران وڌيڪ قرض وٺڻ ۽ آءِ ايم ايف جي اشارن تي عوام مٿان مهانگائي جا ڪوڙا وسائي پرڏيهي مالياتي ادارن جي ايجنڊا کي پورو ڪرڻ ۾ مصروف آهي، عالمي مالياتي ادارن سميت غيرن جي غلامي ۽ مڙني مسئلن کان نجات جو واحد حل ملڪ ۾ شفاف چونڊون، اسلامي نظام ۽ ديانتدار قيادت جي چونڊ آهي، عوام هاڻي ڪرپشن فري ۽ اسلامي توڙي خوشحال پاڪستان لاءِ جماعت اسلامي جو ساٿ ڏئي. اهڙن خيالن جو اظهار هن سجاول ۽ گهارو ۾ عوامي ميڙاڪن کي خطاب ڪندي ڪيو، ضلعي امير الطاف احمد ملاح سميت ٻيا مقامي اڳواڻ پڻ موجود هئا. صوبائي امير جو وڌيڪ چوڻ هو ته ماڻهو ڳاٽي ٽوڙ مهانگائي کان سخت پريشان ۽ ڳرا بجلي بل ادا ڪرڻ لاءِ گهر جو سامان وڪڻي رهيا آهن يا وري خودڪشيون ڪرڻ تي مجبور آهن، پر ظالم حڪمرانن ۽ ڪرپٽ اشرافيه جي ڪن تي جونُ به نٿي سُري، ڪير مري يا جيئي کين آءِ ايم ايف جي غلامي ۽ پنهنجي عياشين سان غرض آهي، سنڌ صوبو ڪرپشن، بدامني ۽ پنهنجا نوازي ۾ سڀ کان اڳتي آهي، هتي نه ڪنهن شهري جي جان، مال ۽ نه ئي عزت محفوط آهي، فاطمه ڦُرڙو سميت معصوم ٻارن سان ٿيندڙ درندجي جا واقعا قابل مذمت ۽ امن، رواداري ۽ باب الاسلام سنڌ جي سڃاڻپ کي ختم ڪرڻ جي سازشن جو حصو آهن، راڻي پور واقعي نه رڳو سنڌ بلڪه پوري انسانيت جو سَر شرم سان جهڪائي ڇڏيو آهي، فامطه جي قاتل ۽ سهولتڪارن کي عبرتناڪ انجام تائين پهچائڻ تائين جماعت اسلامي جي جدوجهد جاري رهندي..#