ڊي سي سجاول جي صدارت هيٺ ٿيليسيميا سينٽر ۽ بلڊ بينڪ قائم ڪرڻ بابت گڏجاڻي

گڏجاڻي ۾ ڪاشف اقبال ٿيليسيميا سينٽر ڪراچي جو سربراهه، ڊي ايڇ او ڊاڪٽر محمد حنيف ميمڻ ۽ ٻيا موجود ھئا

سجاول (گلشيرميربحر) ڊپٽي ڪمشنر جي صدارت هيٺ ضلعي سجاول ۾ ٿيليسيميا سينٽر ۽ بلڊ بينڪ قائم ڪرڻ بابت اھم گڏجاڻي , ڊپٽي ڪمشنر عبدالواجد شيخ چيو آهي ته ضلعي سجاول ۾ ڪاشف اقبال ٿيليسيميا سينٽر ڪراچي جي سھڪار سان مدني ٿيليسيميا سينٽر ۽ بلڊ بينڪ جي نالي ۽ طرز تي ٿيليسيميا ۾ مبتلا ٻارڙن کي ڏورانھن علائقن ۾ وڃڻ بدران پنهنجي ئي علائقي ۾ علاج جون سهولتون فراهم ٿي سگهن - اھڙين ڳالھين جو اظهار ھن درٻار ھال سجاول ۾ ٿيليسيميا سينٽر ۽ بلڊ بينڪ جي قيام بابت ڪاشف اقبال ٿيليسيميا سينٽر ڪراچي جي سربراهه سان منعقد گڏجاڻي دوران ڪيو - ان موقعي تي ڊسٽرڪٽ ھيلٿ آفيسر ڊاڪٽر محمد حنيف ميمڻ ، ڊسٽرڪٽ مينيجر پي پي ايڇ آئي ، صحت کاتي جي نمائندن ۽ ضلعي جي مخير حضرات ، سماجي اڳواڻ ،واپاري ۽ معززين پڻ موجود هئا - ڊپٽي ڪمشنر ٿيليسيميا سينٽر ۽ بلڊ بينڪ جي قيام لاءِ ڊسٽرڪٽ ھيلٿ آفيسر ڊاڪٽر محمد حنيف ميمڻ جي ڪاوشن کي ساراھيندي چيو ته ھن خير جي ڪم ۾ خدمت جو جذبو ھجڻ انتھائي ضروري آهي ته جيئن ھن ضلعي کي بھتر بڻائي سگهجي - ڊپٽي ڪمشنر پنهنجي ھر ممڪن سهڪار جي يقين پڻ ڏياريو - ان موقعي تي ٿيليسيميا سينٽر ۽ بلڊ بينڪ جي قيام لاءِ صحت کاتي ۽ ڪاشف اقبال سينٽر ڪراچي جي سربراهه چيو مفاھمت نامي تي صحيحون ڪرڻ بعد ٻن ھفتن ۾ سينٽر جو باقاعده افتتاح ڪيو ويندو - ڊپٽي ڪمشنر عبدالواجد شيخ چيو ته ضلعي جي عوام کي صحت سميت ٻيون گھربل بنيادي سهولتون فراهم ڪرڻ لاءِ ضلعي انتظاميه ھر وقت ڪوششون وٺي رهي آهي ته جيئن کين ڪنهن به قسم جي تڪليف ۽ پريشانيءَ کي منهن ڏيڻو نه پوي –