نوشھروفيروز ۾ ڪشميرين سان يڪجھتي جي اظھار لاءِ ريلي ڪڍي وئي

پاڪستاني عوام مظلوم ڪشميري ڀائرن سان گڏ آهي ۽ ڀارتي ظلمن جي سخت مذمت ڪريون ٿا: اڳواڻ

نوشهرو فيروز (ڊر) ڪشميري ڀائرن سان يڪجهتي ۽ والاريل ڪشمير تي ڀارتي قبضي خلاف اڄ سڄي ملڪ ۾ ڪارو ڏينهن ملهايو پيو وڃي. ان سلسلي ۾ اڄ ڊپٽي ڪمشنر آفيس کان ايڊيشنل ڊپٽي ڪمشنر اعجاز احمد هاليپوٽو جي اڳواڻي ۾ ريلي ڪڍي وئي، ان موقعي تي ڊي ايڇ او ڊاڪٽر اسدالله ڪلهوڙي کان علاوه سمورن کاتن جي آفيسرن ، عملي، شهرين ۽ شاگردن شرڪت ڪئي. ان موقعي تي مقررين چيو ته پاڪستاني عوام پنهنجي مظلوم ڪشميري ڀائرن سان گڏ آهي ۽ ڀارتي ظلمن جي سخت لفظن ۾ مذمت ڪريون ٿا، هنن چيو ته اسان گڏيل قومن کي اپيل ڪريون ٿا ته ڪشمير ۾ ڀارتي ظلم بند ڪرائڻ لاءِ پنهنجو ڀرپور ڪردار ادا ڪري، هن چيو ته 27 آڪٽوبر هر سال ڪاري ڏهاڙي طور ملهايو پيو وڃي ڇاڪاڻ ته ڀارت ڪشميري عوام جا بنيادي حق طاقت جي زور تي کسي رهيو آهي ۽ اتي بيگناهه ڪشميرين تي ظلم جا جبل ڪيرائي رهيو آهي ۽ ڀارت ڪشميرين جو قتل عام ڪري اڪثريتي آبادي کي اقليت ۾ تبديل ڪرڻ جي ڪوشش ڪري رهيو آهي.