سکر ۾ آل پاڪستان لوڪل گورنمينٽ جي ملازمن جو احتجاج

197 views | 02nd Nov 2023 • سنڌي خبرون

پهرين مرحلي ۾ سکر ڊويزن کان جدوجهد جي شروعات ڪئي پئي وڃي،: اڳواڻ

سکر(بيورو)پاڪستان لوڪل گورنمينٽ ورڪرز فيڊريشن جي مرڪزي چيئرمين ۽ سنڌ صوبي جي صدر سيد ذوالفقار شاهه جي اپيل تي آل پاڪستان لوڪل گورنمينٽ ورڪرز فيڊريشن سنڌ پاران پگهارن ۽ پينشن ۾ غير قانوني ڪٽوتي ۽ دير ختم ڪرڻ لاءِ احتجاجي تحريڪ شروع ڪئي وئي. آل پاڪستان لوڪل گورنمينٽ ورڪرز فيڊريشن سکر ڊويزن پاران لوڪل گورنمينٽ ملازمن محمد بن قاسم پارڪ کان سکر پريس ڪلب تائين احتجاجي ريلي ڪڍي احتجاجي مظاهرو ڪري ڌرڻو هنيو. جڏهن ته شرڪت ڪندڙن مطالبن جي حق ۾ نعريبازي ڪئي، ريلي ۽ ڌرڻو سکر ڊويزن جي صدر عبدالمجيد جسڪاڻي، جنرل سيڪريٽري نواز جماڻي، ڊپٽي جنرل سيڪريٽري علي مردان شيخ، سعيد احمد مهر، دانش قريشي، طارق حسين سولنگي، سيد مسلم شاهه، صداقت زنگيجو، شاهد جتوئي، مظفر جوڻيجو ۽ ٻيا ڪري رھيا ھئا. ان موقعي تي اڳواڻن خطاب ڪندي چيو ته ملازمن جي حقن لاء جدوجهد کي تيز ڪرڻ لاءِ 2 نومبر کان احتجاج جو سلسلو شروع ڪيو ويو آهي ۽ پهرين مرحلي ۾ سکر ڊويزن کان جدوجهد جي شروعات ڪئي پئي وڃي، جنهن ۾ شامل ميونسپل ملازمن پاران احتجاج رڪارڊ ڪرايو پيو وڃي. اڳواڻن چيو ته جيستائين سنڌ جي ميونسپل ملازمن جي پگهارن ۽ پينشن ۾ غير قانوني ڪٽوتي ۽ دير ختم نه ڪئي ويندي تيستائين ميونسپل ملازم پنهنجن حقن جي لاء احتجاج جاري رهندو، اڳواڻن مڪاني ادارن جي ملازمن کي درپيش مسئلن جو نوٽيس وٺندي پرزور مطالبو ڪيو ته انهن ۾ موجود پريشانين کي دور ڪيو وڃي،