سنڌي گرلس اسٽونڊٽس تحريڪ پاران ڊاڪٽر سنيھا جوتي جي پراسرار موت تي ڏک جو اظھار

112 views | 07th Dec 2023 • سنڌي خبرون

سنڌي گرلس اسٽونڊٽس تحريڪ پاران ڊاڪٽر سنيھا جوتي جي پراسرار موت تي ڏک جو اظھار

حيدرآباد(پ-ر) سنڌي گرلس اسٽونڊٽس تحريڪ جي مرڪزي صدر رفيعہ پليجو، صبا سمون ، فاطمه منڱريو، راحيلا ڀٽو، روشني پٺاڻ ھميرا اختر ۽ ٻين اڳواڻن خيرپور ميڊيڪل ڪاليج جي ھاسٽل ۾ شاگردياڻي ڊاڪٽر سنيھا جوتي ڪيسواڻي جي پراسرار موت واري واقعي تي انتھائي ڏک ۽ افسوس جو اظھار ڪندي واقعي کي وڏو الميو قرار ڏيندي چيو آھي تہ جتي اسان جون نياڻيون پڙھي ڊگريون حاصل ڪرڻ وڃن ٿيون، اتان انھن جا لاش ملڻ المناڪ صورتحال آھي، جي ڪڏھن نائلا رند ۽ نمرتا ڪماري، نوشين ڪاظمي جي واقعن کان پوء ھاسٽلن کي ھر حوالي سان محفوظ بنايو وڃي ھا تہ اڄ خيرپور ميڊيڪل ڪاليج جي ھاسٽل مان اسان جي ھڪ لائق نياڻي جو لاش نہ اچي ھا۔ اڳواڻن چيو تہ سنيھا جوتي جي موت جي گھڻ رخي جاچ ٿيڻ گھرجي، اسان جون يونيورسٽيون مقتل گاھ ڇو بنيل آھن؟ ھاسٽلون ڇو محفوظ ناھن؟ جيڪڏھن اتي سي سي ڪيمرا سسٽم ۽ چوڪيداري سسٽم ھجي ھا تہ واقعو پيش نہ اچي ھا ۽ ان سان سڀ شاگردياڻيون 24 ڪلاڪ نگراني ۾ ھجن ھا۔ اڳواڻن چيو تہ ڳاٽي ٽوڙ فيسن باوجود يونيورسٽيون ۽ ھاسٽلون لاوارث آھن، جتي شاگرد ۽ شاگردياڻيون آساني سان موت جي ڀاڪرن ۾ ھليا وڃن ٿا. جيڪڏھن يونيورسٽين ۾ ناحق خون سان انصاف ٿئي ھا ۽ ذميوارن کي سزا اچي ھا تہ اڄ ھي افسوسناڪ واقعو پيش نہ اچي ھا۔ اڳواڻن چيو تہ واقعي جي عدالتي جاچ ٿيڻ گھرجي۔ يونيورسٽي انتظاميه شاگردياڻي جي موت جي ذميوار آھي۔ انتظاميہ جي نااھلي ۽ مجرماڻ غفلت شامل آھي۔ ذميوارن جو تعين ڪري انھن کي سزا ملڻ گھرجي.