غوثپور ويجھو مارٽر گولو ڦاٽڻ سبب 2 نينگر ٿڏي تي اجل جو شڪار، 2 سخت زخمي

152 views | 27th Dec 2023 • سنڌي خبرون

غوثپور ويجھو مارٽر گولو ڦاٽڻ سبب 2 نينگر ٿڏي تي اجل جو شڪار، 2 سخت زخمي

غوثپور ويجھو دراني مهر ٿاڻي جي حد ڳوٺ قياس خان ڀيو ڀر سان مارٽر گولو ڦاٽڻ سبب ڪاٺيون ڪندڙ 9 سالن جو نينگر زوهيب ۽ 13 سالن جو آڪاش ڀيو ٿڏي تي فوت ٿي ويا جڏهن ته مارٽر گولو ڦاٽڻ سبب عمر ۽ ماجد سخت زخمي ٿي پيا آهن جن کي وارثن پاران ڪنڌڪوٽ جي سرڪاري اسپتال منتقل ڪيو ويو جٿي زخمين کي ابتدائي طبي امداد ڏني وئي ان موقعي تي ٻنھي زخمين جي حالت نازڪ ھجڻ سبب کين سکر اسپتال منتقل ڪيو ويو آهي جڏھن تہ فوتين جا مڙھ ضروري ڪاروائي بعد وارث گھر کڻائي ويا مقتولن جا مڙھ گھر پھچڻ تي ڪھرام مچي ويو ۽ علائقي ۾ سوڳ پکڙجي ويو آھي مليل ڄاڻ موجب ڌماڪي دوران مارجي ويل ۽ زخمي ٿيل ڳوٺ ڀرسان ڪاٺين لاء ويا تہ اوچتو ڌماڪو ٿيو علائقي ۾ چوٻول آھن تہ دراني مھر ٿاڻي جي حد ۾ ڪشمور ضلعي جي پوليس بندن تي مختلف پڪٽن تي ترسيل آھي جھنگ ۾ ماڻھون نظر اچڻ تي پوليس پاران ڌاڙيلن جي شڪ تان مٿن لانچر جو گولو فائر ڪيو ويو جنھن سبب واقعو پيش آيو ٻئي طرف ايس ايس پي ڪشمور جي ترجمان پاران پريس رليز جاري ڪندي ڄاڻايو آھي ته زمين تي ڪريل مارٽر گولو ڦاٽڻ سبب واقعيو پيش آيو آهي وڌيڪ جاچ ڪئي پئي وڃي ٻئي پاسي فوتي نينگرن جي گهرن ۾ ڪهرام متل آهي متاثرن پاران واقعي جي اڻڌري جاچ ڪرائي انصاف جو مطالبو ڪيو ويو آھي