سجاول پوليس پاران ڏاج جي سامان سان ڦر ٿيل ٽرڪ ھٿ ڪرڻ جي دعويٰ

سجاول پوليس پاران ڏاج جي سامان سان ڦر ٿيل ٽرڪ ھٿ ڪرڻ جي دعويٰ

سجاول (گلشير ميربحر)سجاول پوليس ڪاروائي ڪندي ڪجھ ڏينھن اڳ ڦر ڪيل ڏاج جي سامان سان ڀريل شھزور ٽرڪ ھٿ ڪري بين الاضلاعي گروھ جي ٻن ڏوھارين کي گرفتار ڪري ورتو آھي. اھڙو اظھار ايس ايس پي سجاول شھلا قريشي پنھنجي آفيس ۾ پريس ڪانفرنس ڪندي ڪيو. ھن چيو تہ ھڪ ھفتو اڳ چوھڙ جمالي روڊ تي سمان گولائي وٽ 6 ھٿياربند ڏوھارين چوھڙجمالي ويندڙ ڏاج جو سامان کڻي ويندڙ شيدي برادري جي ماڻھن کان ڏاج جو سامان شھزور گاڏي سميت ڦر ڪري ورتو ھو. جيڪو گذريل رات ٻي جڳھ تي منتقل ڪرڻ دوران ڳجھي اطلاع ملڻ تي ٻيلو رانٽا روڊ تي ڪاروائي ڪندي سي آئي اي انچارج سليم رضا ميرجت پنھنجي ٽيم سان گڏ ٻن ڏوھارين لڌو بچاڻي ۽ بچايو لوٺيو کي گرفتار ڪري وٽانئن شھزور گاڏي ۽ ڏاج جو سامان برآمد ڪري ورتو آھي. ھن ٻڌايو تہ گرفتار جوابدار لڌو بچاڻي 10 کان وڌيڪ چوري، ڌاڙن ۽ ڦرن جي ڪيسن جو رڪارڊ رکندڙ آھي ۽ بچايو لوٺيو خلاف بہ 8 کان وڌيڪ ڪيس داخل ٿيل آھن. جڏھن تہ ٻين ضلعن مان بہ انھن جو رڪارڊ گهرايو پيو وڃي. گرفتار جوابدارن وٽان ھڪ ٽي ٽي پسٽل، ھڪ ڪارتوسي پسٽل ۽ 6 گولين جا رائونڊ برآمد ڪيا ويا آھن. اڃان جوابدارن کان وڌيڪ جاچ ڪئي پئي وڃي.