رسول بخش پليجو سنڌو درياھ جو وڪيل ھو: اياز لطيف پليجو

سنڌ جي ڏاهي رسول بخش پليجي جي سالگرهه اڄ ملهائي ويندي

حيدرآباد: قومي عوامي تحريڪ پاران سڀاڻي (اڄ) عظيم مفڪر رسول بخش پليجو جي 95 سالگرھ سڄي سنڌ ۾ ملھائي ويندي.ان سلسلي ۾ سڄي سنڌ ۾ تقريبون ڪوٺايون ويون آھن. قومي عوامي تحريڪ ۽ سنڌياڻي تحريڪ سميت سمورن محاذن جا مرڪزي اڳواڻ عظيم مفڪر رسول بخش پليجو جي جدوجھد تي لفظن جي ڀيٽا پيش ڪندا. قومي عوامي تحريڪ سربراھ اياز لطيف پليجي چيو تہ رسول بخش پليجو صاحب مضبوط دليلن سان سنڌ جي پاڻي جو ڪيس وڙھيو، رسول بخش پليجو صاحب سنڌو درياھ جو وڪيل ھو ھن سڄي سنڌ جي ڳوٺ ڳوٺ ۽ شهرن ۾ وڃي ھارين، مزدورن، عورتن، شاگردن ٻارن کي بيدار ڪيو. رسول پليجو اھا يونيورسٽي ھو، جنھن سنڌ جي عوام کي عالمي ادب، ترقي پسندي، روشن خيالي، انسان دوستي، مظلوميت جو طرفداري، انتھاپسندي، ڪرپشن خلاف ۽ رات جي رھزنن سان وڙھڻ سيکاريو۔اياز لطيف پليجي چيو تہ رسول بخش پليجو صاحب سنڌو درياھ تي ڌاڙي، ڪالاباغ ڊيم، گريٽر ٿل ڪئنال، غير قانوني پرڏيھين، مھاجر صوبي، ون يونٽ، زمينن جي نيلامي، پيپلز پارٽي جي ڪرپشن خلاف بي مثال تحريڪون ھلائي لازوال ڪاميابيون حاصل ڪيون.اياز لطيف پليجي چيو تہ سنڌ سڀ کان وڌيڪ روينيو ڏيندڙ صوبو آھي. سنڌ جو تيل، گئس ۽ ٻيا وسيلا وفاق جي حوالي آھن. سنڌ جي ڪمائي تي سڄو ملڪ ھلي ٿو. سنڌ ۾ جتان گئس نڪري ٿو اتي جا ماڻھو گئس جي سھولت کان محروم ڪيا ويا آھن. ملڪ ۾ سڀ کان وڌيڪ بجلي جي لوڊ شيڊنگ سنڌ ۾ آھي. گئيس جي لوڊ شيڊنگ جو عذاب بہ سنڌ ۾ آھي. سڀ کان وڌيڪ مھانگائي بہ سنڌ ۾ آھي. ملڪ ۾ سڀ کان وڌيڪ ڪرپشن بہ سنڌ ۾ آھي. سنڌ ۾ ڌاڙيل راڄ آھي، روزگار ناھي، بک، بدحالي ۽ بيروزگاري آھي، جھالت ۽ لاقانونيت آھي سنڌ جا ماڻھو عوام دشمن نظام مان بيزار آھن.