عمرڪوٽ ڀرسان ھانُ ڏاريندڙ روڊ حادثو، 4گهرڀاتين سميت 5 ڄڻا اجل جو شڪار

سامارو روڊ تي ڪلٽس ڪار ۽ مزدا وچ ۾ زوردار ٽڪر، معصوم ٻارڙن سميت پنج ڄڻا اجل جو شڪار

عمرڪوٽ(رپورٽ:ڪانجي مل رکيسر) عمرڪوٽ ڀرسان ھانُ ڏاريندڙ روڊ حادثو، ھڪئي گھر جي 4 ڀاتين سميت 5 ڄڻا فوت، گھر ۾ قھرام متل، سوڳوار ماحول ڇائينل. خبر موجب عمرڪوٽ سامارو روڊ تي سونپور اسٽاپ لڳ ھان ڏاريندڙ روڊ حادثو پيش آيو آھي جتي ڪلٽس ڪار ۽ مزدا وچ ۾ زوردار ٽڪر جي نتيجي ۾ عمرڪوٽ شھر جي چنديرام پاڙو جي رھواسي منگھارام مالھي جو نوجوان پٽ ڪيلاش مالھي سندس ڀاڄائي جنتا زال سروڻ مالھي، 4 سالا ڪارتيڪ پٽ سروڻ مالھي، 6 سالا مھاوير پٽ سروڻ مالھي ۽ ڊرائيور پرشوتم اوڏ تڏي تي فوت ٿي ويا جڏھن ته معصوم ٻارڙو وويڪ پٽ ڪيلاش مالھي زخمي ٿي پيو جڏھن ته حادثي جي اطلاع تي پوليس ۽ مقامي ماڻھن زخمين ۽ فوتين کي سول اسپتال آندو جتي ايمرجنسي لاڳو ڪئي ويئي ۽ اطلاع ملڻ تي سوين شھري پڻ سول اسپتال پُھچي ويا جتي فوتين ج لاش ضروري ڪاروائي بعد وارثن حوالي ڪيا ويا جڏھن ته زخمي ٻارڙي کي طبي امداد ڏيڻ بعد ڳڻتي جوڳي حالت ۾ حيدرآباد منتقل ڪيو ويو

ھوڏانھن فوتين جا لاش گھر پُھچڻ تي روڄ راڙو قھرام مچي ويو ۽ علائقي ۾ پڻ 5 ڄڻا فوت ٿيڻ تي سوڳوار ماحول ڇائينجي ويو ھو ۽ ھر اک آلي ھئي

عمرڪوٽ:حادثي ۾ فوت ٿي ويل جنتا زال سروڻ مالھي پنھنجي والدين وٽ سامارو ويل ھئي ته سندس ڏير ڪيلاش مالھي سان گڏ عمرڪوٽ اچي رھيا ھئا ته حادثو پيش آيو فوتي ڪيلاش مالھي جي 2 سال اڳ ۾ شادي ٿي ھئي

عمرڪوٽ:روڊ حادثي سبب ڪلٽس ڪار مڪمل طور تي تباھ ٿي ويئي پيش آيل ڏکويندڙ حادثي جو رات دير تائين ڪوبه ڪيس داخل نه ٿيو ھو جڏھن ته حادثي جو ڪارڻ مزدا جو ڊرائيور فرار ٿي ويو ۽ حد جي تعلقه پوليس مزدا گاڏي کي تحويل ۾ وٺي ڇڏي آھي