ڏوڪري ويجھو ڄاڃين سان ڀريل ٽريڪٽر ٽرالي ڪلٽي، 4 ڄڻا اجل جو شڪار، 20 کان وڌيڪ زخمي

ڳوٺ ڍنڍ وٽ ڄاڃين سان ڀريل ٽريڪٽر ٽرالي ڪلٽي ٿي کاھي ۾ ڪري پئي

ڏوڪري(اطهر ميمڻ) ڏوڪري ويجھو ڳوٺ ڍنڍ وٽ ٽريڪٽر ٽرالي کاھي ۾ ڪلٽي ٿي پئي، جنھن جي نتيجي ۾ وھان تي ويندڙ ڄاڃين سان ڀريل ٽرالي ڪلٽي ٿيڻ جي نتيجي ۾ 4 ڄڻا فوت ۽ 20 کان وڌيڪ ٻارڙا، عورتون ۽ مرد ٽرالي ھيٺان دٻجي زخمي ٿي پيا آھن، جنھن کي ڪڍڻ لاءِ آس پاس جا ڳوٺاڻا پھتا، جڏهن ته اطلاع تي ايئرپورٽ پوليس جا اهلڪار واقعي واري هنڌ پهچي امدادي سرگرمين ۾ شامل ٿي ويا آهن. ھوڏانھن تعلقه اسپتال ڏوڪري مان ايمبولنسون ۽ ريسڪيو 1122 طرفان واقعي واري هنڌ روانيون ڪيون ويون آھن. ھوڏانھن مليل معلومات موجب ڳوٺ ڍنڍ واسي نوجوان وسيم ڪيريو جي نصيرآباد مان شادي بعد ڄاڃين سان ڀريل ٽريڪٽر ٽرالي واپس اچي رھي ھئي ته ڳوٺ ڍنڍ ٻاھران حادثي جو شڪار بڻي، جن مان 4 زخمين کي تعلقي اسپتال ڏوڪري پھچايو ويو آهي، جتي زخمن جا سور نه سگھندي فوت ٿي ويا. فوتين ۾ گھوٽ جو ننڍو ڀاءُ 6 سالن جو عبدالله ڪيريو، 50 سالن جي زرينه چنو، سندس پوٽي 12 سالن جي بسمه چنو ۽ 7 سالن جو ماجد ڪيريو شامل آھن. ٻئي طرف ايمبولنس ۽ ريسڪيو 1122 ۽ عام گاڏين ذريعي زخمين کي چانڊڪا اسپتال لاڙڪاڻو منتقل ڪيو پيو وڃي، جنھن سبب فوتين جي انگ ۾ واڌ جو خدشو ظاھر ڪيو پيو وڃي. ھوڏانھن اسپتال ٻاھران حادثي ۾ فوتين جا وارث روئندا ۽ رڙيون ڪندا رھيا، ضروري ڪارروائي بعد لاش وارثن حوالي ڪيا ويا.