ڪراچي: شاهراهه فيصل تي ڪار جي ٽڪر ۾ صحافي تشڪيل حيدر سنديلو سميت 2 نوجوان فوت
صحافي تشڪيل حيدر سنديلو جو مڙهه اباڻي ڳوٺ حڪيم سنديلو منتقل
ڪراچي(اسٽاف رپورٽر)شاهراهه فيصل تي روڊ حادثو، صحافي تشڪيل سنديلو سميت 2 ڄڻا فوت، سينيئر وزير شرجيل ميمڻ جو صحافي تشڪيل سنديلو جي لاڏاڻي تي گھري ڏک ۽ افسوس جو اظھار، تفصيل موجب ڪراچي جي شاهراهه فيصل تي نرسري وٽ تيز رفتار ڪار جي ٽڪر ۾ موٽر سائيڪل تي سوار صحافي تشڪيل حيدر سنديلو ۽ کائنس لفٽ وٺندڙ اڻسڃاتل نوجوان فوت ٿي ويا، جڏھن تھ گاڏي تي سوار ڊرائيور فرار ٿيڻ ۾ ڪامياب ٿي ويو، جنھن بعد لاش اسپتال منتقل ڪيا ويا، جڏھن تھ ٻئي فوتي نوجوان جي سڃاڻپ نھ ٿي سگھي، صحافي تشڪيل سنديلو رات آفيس کان گهر اچي رهيو هو ته حادثو پيش آيو، صحافي تشڪيل سنديلو جو مڙهه جناح اسپتال مان ڪارروائي بعد وارثن حوالي ڪيو ويو، جنھن بعد لاش سندس قائد آباد واري گھر آڻڻ بعد باقراڻي ويجھو اباڻي ڳوٺ حڪيم سنديلو ڏانھن نيو ويو. جتي جنازي نماز بعد مڙھھ آلين اکين سان مٽيءَ ماءُ حوالي ڪيو ويو. صحافي تشڪيل سنديلو پونئرن ۾ ٽي ٻار ۽ ھڪ بيواھ ڇڏي آھي. جيئن تھ صحافي تشڪيل سنديلو سينيئر صحافي فرمان سنديلو جو ننڍو ڀاءُ ھو، پي آءِ ڊي آفيسر مقبول سنديلو، ثاقب سنديلو جو سئوٽ، سينيئر صحافي تصوير سنديلو جو ماروٽ، سينيئر صحافي ڀائرن طارق سنديلو، زبير سنديلو، ماجد سنديلو جو پڦاٽ ھو.
0 تبصرے