اياز لطيف پليجي سان مخالف ڌر جي وفد جي ملاقات، تڪراري منصوبن بابت غور ويچار

سڀني صوبن کي ڳنڍڻ جا ذريعا آئين، عدليه ۽ سنڌو درياھ آهي: اياز لطيف پليجو

حيدرآباد: مخالف ڌر جي وفد قومي عوامي تحريڪ جي سربراھ اياز لطيف پليجو جي رھائش گاھ قاسم آباد پھچي ساڻس ملاقات ڪئي. وفد ۾ پي ٽي آءِ اڳواڻ، اڳوڻو اسپيڪر اسد قيصر، صاحبزاده حامد رضا، محمود خان اچڪزئي، سردار لطيف کوسو، ناصر شيرازي، ساجد ترين، حليم عادل شيخ ۽ ٻيا شامل هئا. اجلاس ۾ 26 هين آئيني ترميم، پي اي سي اي ايڪٽ ۽ سنڌو درياءَ مان 6 نوان ڪئنال ڪڍڻ جي معاملي تي بحث ڪيو ويو. اياز لطيف پليجي چيو تہ سڀني صوبن کي ڳنڍڻ جا ذريعا آئين، عدليه ۽ سنڌو درياھ آهي. سنڌ سميت سڄي ملڪ ۾ گورننس ۽ آئيني بالادستي جو بحران آهي. جيڪڏهن چولستان ۽ ٻيا ڪئنال ٺاهيا ويا تہ سنڌ جو پاڻي بند ٿي ويندو. اڳوڻي اسپيڪر اسد قيصر ۽ سني اتحاد ڪائونسل جي صاحبزاده حامد رضا چيو تہ موجوده پارليامينٽ ۾ عوام جو مينڊيٽ شامل ناهي. عدليه کي 26 هين آئيني ترميم ۽ صحافت کي پيڪا ذريعي قتل ڪيو ويو آهي. اياز لطيف پليجي چيو تہ مسئلن جو حل پابنديون ۽ ٽڪراءَ نہ پر هڪ منصفانه، روادار ۽ جمهوري فيڊريشن آهي. سنڌ جي بقا ۽ مستقبل سنڌو درياءَ سان آهي. اصد قيصر ۽ صاحبزادي حامد رضا چيو تہ اسين سنڌ جي هارين سان گڏ آهيون، اسين ڪنهن کي بہ سنڌ جو پاڻي چوري ڪرڻ جي اجازت نہ ڏينداسين. ملڪ ۾ ظلم آهي، چونڊون چوري ڪيون ويون. اياز لطيف پليجي چيو تہ حڪمرانن لاءِ ماڻهو، نوڪريون، زراعت ۽ پاڻي اهم نہ رهيا آهن. جيڪڏهن آئين کي نقصان پهتو تہ عوام کي نقصان پهچندو. سنڌ کي لينڊ مافيا ۽ قبضا گيرن جي پناهه گاهه ۾ تبديل ڪيو ويو آهي. حڪومت اقتداري مفادن لاءِ عوامي حقن تان دستبردار ٿي چڪي آهي. اسد قيصر، سلمان اڪرم راجا چيو تہ اسين ماڻهن جي حقن لاءِ وڙهي رهيا آهيون، اسين هر دروازي تي دستڪ ڏينداسين. اسان ٽئين امپائر ڏانهن نہ ڏسي رهيا آهيون. اياز لطيف پليجي چيو تہ گرين پاڪستان جي نالي تي سنڌ جي زمينن ۽ پاڻي تي قبضو بند ڪيو وڃي. ملڪ ۾ عوام جي نمائندگي ڪندڙ ڪا بہ اسيمبلي ناهي. مخالف ڌر جي اڳواڻن چيو تہ سنڌو درياءَ تي نوان ڪئنال ٺاهڻ ملڪ جي بقا جو معاملو آهي، اسان ان خلاف آواز اٿارينداسين. 6 نون ڪئنالن جي تعمير جي خلاف سنڌ جي موقف جي حمايت ڪريون ٿا. اياز لطيف پليجي ۽ اصد قيصر چيو تہ اسان پاڪستان ۾ قانون جي حڪمراني ۽ حقيقي جمهوريت چاهيون ٿا.