اڳوڻو وفاقي وزير ۽ جي ڊي اي اڳواڻ غلام مرتضيٰ جتوئي ڏوڪري عدالت ۾ پيش

ڏوڪري(رپورٽر) اڳوڻو وفاقي وزير مرتضيٰ جتوئي عدالت ۾ پيش، پڪو چالان پيش ڪرڻ لاءِ 15 مارچ جي تاريخ مقرر. ڏوڪريءَ ۾ اڳوڻو صوبائي وزير ۽ جي ڊي اي اڳواڻ مرتضي جتوئي پنهنجي وڪيلن سان گڏ ڏوڪريءَ جي عدالت ۾ پيش ٿيو. اڳوڻو صوبائي وزير ۽ جي ڊي اي اڳواڻ مرتضيٰ جتوئي ڏوڪري ۽ باڊهه ٿاڻن تي داخل ڊيوٽي اٽڪاءَ جي ٻن ڪيسن ۾ جوڊيشنل ماجسٽريٽ اينڊ سول جج 2 بلاول رفيق بروهي جي عدالت ۾ پيش ٿيو. مرتضيٰ جتوئيءَ خلاف ڏوڪري ٿاڻي تي ڪيس نمبر 02/2025 سيڪشن 324، 353، 401 پي پي سي تحت ۽ باڊهه ٿاڻي تي ڪيس نمبر 09/2025 سيڪشن 324، 402، 353 پي پي سي تحت داخل آهن، جيڪي ٻئي ڪيس پوليس سان ڊيوٽي اٽڪاءَ بابت آهن. پيشي دوران مرتضي جتوئيءَ جي وڪيلن طرفان سندس ضمانت آرڊر عدالت ۾ پيش ڪيو ويو، جڏهن ته ڪيس جو ڪچو چالان اڳ ئي پيش ٿيل هو. عدالت پڪو چالان جمع ڪرائڻ لاءِ 15 مارچ 2025 جي تاريخ مقرر ڪري ڇڏي. هوڏانهن جي ڊي اي اڳواڻ مرتضي جتوئي کي تعلقي بار صدر الطاف حسين کوکر، سئينر وڪيل قاضي منظور احمد، تعلقہ بار جنرل سيڪريٽري محمد هاشم چانڊيو ۽ ٻين وڪيلن پاران بار ۾ شاندار آڌر ڀاءُ ڪيو.