ابراهيم حيدري ميونسپل ڪارپوريشن جي اهتمام هيٺ ڪرسمس جي تقريب منعقد
اقليتي برادري سان تعلق رکندڙ اڳواڻن،پ پ جي عهديدارن ۽ ڪارڪنن وڏي انگ ۾ شرڪت ڪئي
ملير (رپورٽ: عبدالرشيد مورجھريو)ٽائون ميونسپل ڪارپوريشن ابراهيم حيدري طرفان شاهه لطيف ٽائون ۾ ڪرسمس جي خوشين جي موقعي تي هڪ پروقار تقريب منعقد ڪئي وئي، جنهن ۾ اقليتي برادري سان تعلق رکندڙ اڳواڻن،پاڪستان پيپلز پارٽي جي عهديدارن ۽ ڪارڪنن وڏي انگ ۾ شرڪت ڪئي۔تقريب جا مهمانِ خاص پاڪستان پيپلز پارٽي ملير جا جنرل سيڪريٽري امداد جوکيو هئا، جڏهن ته تقريب ۾ ٽائون چيئرمين ابراهيم حيدري نذير احمد ڀٽو، پيپلز پارٽي مائنارٽي ونگ سنڌ جي نائب صدر مکهي اوڌامل ۽ ڪراچي ڊويزن جي صدر مشتاق مٽو پڻ خاص طور تي شريڪ ٿيا۔ان موقعي تي مقررین ڪرسمس جي اهميت ۽ بين المذاهب هم آهنگي بابت ڳالهائيندي چيو ته پاڪستان پيپلز پارٽي هميشه اقليتن جي حقن جي تحفظ، مذهبي رواداري ۽ ڀائيچاري جي فروغ تي يقين رکي ٿي۔ مقررین جو چوڻ هو ته اقليتي برادري ملڪ جي تعمير ۽ ترقي ۾ اهم ڪردار ادا ڪري رهي آهي ۽ سندن خوشين ۾ شريڪ ٿيڻ اسان سڀني جي گڏيل ذميواري آهي۔تقريب ۾ اقليتي اڳواڻن ۽ پارٽي ڪارڪنن وڏي تعداد ۾ شرڪت ڪئي، جن ڪرسمس جون خوشيون ملهايون ۽ هڪ ٻئي کي مبارڪباد ڏني۔ تقريب جي پڄاڻي تي ڪيڪ ڪاٽيو ويو ۽ شرڪت ڪندڙن ۾ تحفا ورهايا ويا، جڏهن ته امن، ڀائيچاري ۽ ملڪ جي سلامتي لاءِ خصوصي دعائون پڻ ڪيون ويون۔ شرڪت ڪندڙن تقريب جي اهتمام تي ٽائون ميونسپل ڪارپوريشن ابراهيم حيدري ۽ پاڪستان پيپلز پارٽي جي قيادت جو شڪريو ادا ڪندي ان کي بين المذاهب هم آهنگي جي فروغ لاءِ هڪ مثبت قدم قرار ڏنو۔