شاهه لطيف پوليس جي ڪارروائي، صحت لاءِ هاڃيڪار مصالحو ٺاهيندڙ 5 جوابدار گرفتار
ڪارروائي پير سرھندي ڳوٺ، ٽي سي ايف اسڪول ڀرسان قائم هڪ گودام تي ڪئي وئي: پوليس
ملير (رپورٽ: عبدالرشيد مورجھريو)شاهه لطيف ٽائون پوليس ڳجهي اطلاع تي ڪارروائي ڪندي صحت لاءِ هاڃيڪار مصالحو تيار ڪرڻ ۽ وڪرو ڪرڻ ۾ ملوث پنج جوابدارن کي گرفتار ڪري ورتو آهي. ڪارروائي پير سرھندي ڳوٺ، ٽي سي ايف اسڪول ڀرسان قائم هڪ گودام تي ڪئي وئي. ايس ايڇ او شاهه لطيف پوليس ٽيم سان گڏجي گودام تي ڇاپو هنيو، جتان محمد ساجد، عمر فاروق، رضوان، محمد يعقوب ۽ محمد دائود کي گرفتار ڪيو ويو. پوليس گودام مان 08 ڪٽا گرم مصالحو، 28 اڌ ڀريل گيلا مصالحا ڊرم، 05 خالي ڊرم ۽ وڏي مقدار ۾ پيڪنگ ميٽيريل به هٿ ڪيو.پوليس مضرِ صحت مصالحو سپلاءِ ڪرڻ ۾ استعمال ٿيندڙ مزدا ٽرڪ نمبر 3583-JZ کي به پنهنجي قبضي ۾ وٺي ڇڏيو آهي.ابتدائي جاچ دوران جوابدارن انڪشاف ڪيو آهي ته خراب ۽ مضرِ صحت مصالحو ٻيهر تيار ڪري نئين پيڪنگ ۾ مختلف مارڪيٽن ۽ بازارن ۾ وڪرو ڪيو ويندو هو. پوليس سڀني گرفتار جوابدارن خلاف ڪيس داخل ڪري وڌيڪ جاچ جاري رکي آهي. پوليس عملدارن جو چوڻ آهي ته عوامي صحت سان کيڏندڙن خلاف بنا ڪنهن رعايت جي ڪارروائي جاري رهندي.