ڪراچي ۾ سنڌي فنڪارن کي نظر انداز ڪرڻ خلاف احتجاجي مظاهرو

سنڌ حڪومت ٻه اکيائي ڪندي اهو تاثر ڏنو آهي ته يا ته سنڌي فنڪار محب وطن ناهن يا ڪراچي سنڌ کان الڳ آهي:مظاھرين

ڪراچي (اسٽاف رپورٽر) ميلوحا آرٽ سرڪل جي سڏ تي ڪراچي پريس ڪلب اڳيان مرڪزي جوائنٽ سيڪريٽري منور جوڻيجو ۽ ڪراچي ڊويزن جي صدر عزيز ڀٽو جي اڳواڻي ۾ احتجاجي مظاهرو ڪيو ويو. احتجاج سنڌ حڪومت طرفان رٿيل "معرڪه حق" جشن آزادي پروگرام مان سنڌي فنڪارن کي بي دخل ڪرڻ خلاف ڪيو ويو. احتجاج ۾ اداڪار، گلوڪار ۽ ڪراچي ڊويزن جي عهديدارن احسن جمالي، اصغر جوڻيجو، اصغر ميراڻي، آصف ڀٽو، ڪي بي ميتلو، اي ڊي جماڻي، واحد جماڻي، ثنا بلوچ، جي آر ساگر ۽ ٻين شرڪت ڪئي. مرڪزي جوائنٽ سيڪريٽري منور جوڻيجو خطاب ڪندي چيو ته سنڌ حڪومت ٻه اکيائي ڪندي اهو تاثر ڏنو آهي ته يا ته سنڌي فنڪار محب وطن ناهن يا ڪراچي سنڌ کان الڳ آهي. هن چيو ته فنڪارن کي جشن آزادي جي وڏي پروگرام ۾ شريڪ نه ڪرڻ سان فنڪار برادري ۾ شديد ڪاوڙ ۽ رنج پيدا ٿيو آهي، جيڪا ويساهه گهاتي آهي. هن مطالبو ڪيو ته ان واقعي جي منصفاڻي جاچ ڪئي وڃي ته آخر ڇو سنڌي فنڪارن کي وطن جي آزادي جي ڏينهن تي وطن کي ڀيٽا پيش ڪرڻ کان محروم ڪيو ويو. ڪراچي ڊويزن جي صدر عزيز ڀٽو چيو ته وطن سان محبت جو اظهار ڪرڻ لاءِ ٻوليءَ جو ڪو قيد نٿو هجي. “اسين سڀ پاڪستان جا محب وطن آهيون، پر ڪراچي ۾ سنڌ حڪومت پاران جشن آزادي پروگرام مان سنڌي فنڪارن کي بي دخل ڪري دل آزاري ڪئي وئي آهي.”