کراچی میں ڈمپرز اور باقی سندھ میں ڈاکو راج، منشیات فروشوں اور سسٹم کا راج ہے،کاشف سعید شیخ

کراچی(اسٹاف رپورٹر) جماعت اسلامی سندھ کے امیر کاشف سعید شیخ نے کہا ہے کہ کراچی میں ڈمپرز اور باقی سندھ میں ڈاکو راج، منشیات فروشوں اور سسٹم کا راج ہے پھر ان سب کو حکومتی پارٹی میں شامل بااثر شخصیات کی سرپرستی حاصل ہے۔ مرادعلی شاہ کی سندھ حکومت سیکیورٹی کے نام پر اربوں روپے خرچ کرنے کے باوجود شہریوں کی جان و مال کی حفاظت اور قیام امن مین مکمل ناکام ثابت ہوئی۔ عملی طورمیں سندھ میں ڈاکو اور کرپشن کا راج ہے جس کی وجہ تعلیم، صحت، ٹرانسپورٹ سمیت ہر شعبہ تباہ ہے۔صرف صوبائی دارلخلافہ روشنیوں کے شہر کراچی میں رواں سال کے سات ماہ کے دوران 500 سے زائدافراد ٹریفک حادثات اور ڈمپرز کے ٹکر سے جان کی بازی ہارچکے، صوبے کے دوسرے شہروں کا تو حساب ہی نہیں ہے۔یہ ٹریفک پولیس سمیت سندھ حکومت کی نااہلی ہے۔ چوروں، منشیات فروشوں، بھتہ خوروں کو مکمل چھوٹ، عوام کے تحفظ کی کوئی فکر نہیں سندھ حکومت کی ترجیح عوام کے جیبوں پر ڈاکہ صرف گاڑیوں کی نمبر پلیٹ کی تبدیلی ہے۔ دود اور پانی بیچنے والے پارٹی رہنما توکھرب پتی بن گئے مگر سندھ کے عوام آج بھی زندگی کی بنیادی سہولیات سے محروم ہیں۔ سندھ کے تیسرے بڑے شہر سکھر ،حیدرآباد، کراچی سمیت کئی شہروں کے عوام پینے کے پانی کے لیے بھی پریشان ہے جو پارٹی سترہ سال تسلسل کےساتھ اقتدار میں رہنے کے باوجود عوام کو پینے کا پانی بھی فراہم نہ کرسکے ان سے بہتری کی امید مزید کیا کی جاسکتی ہے۔ تیل گیس کوئلے جیسی قدرتی دولت سے مالا مال ہونے کے باوجود نااہل قیادت کی وجہ سے سندھ کے عوام غربت و افلاس اور محرومیوں کی عملی تصویر بنے ہوئے ہیں۔ صرف اہل اور دیانتدار قیادت ہی سندھ کی ترقی عوام کے مسائل حل اور ان کو اپنے حقوقِ دلا سکتی ہے۔ عوام جماعت اسلامی کا ساتھ دیں۔ ذمے داران عوامی رابطہ کمیٹیاں قائم کرکے عوام کے مسائل کے حل کے لیے جدوجہد تیز کردیں۔ ان خیالات کا اظہار انہوں نے مہران مرکز سکھر میں سکھر ڈویڑن کے ہر سطح کے ذمے داران کے اجلاس سے خطاب کرتے ہوئے کیا۔ ان کا کہنا تھا کہ سندھ ملکی پیداوار میں سب سے زیادہ گیس وبجلی دینے کے باوجود صوبہ میں 18گھنٹوں کی لوڈ شیڈنگ اور چولہے ٹھنڈے پڑے ہوئے ہیں۔ تھر کے کوئلے کے ذریعے بننے والی بجلی سے دوسرے صوبے میں کارخانے چلتے ہیں مگر سندھ میں اندھیروں کا راج ہے۔اس کی واحد ذمے دار مفادت پرست حکمران پارٹی ہے جس نے اقتدار کے بدلے پانی پر ڈاکہ، زمینوں کی بندر بانٹ، گورکھ ہل، کارونجھر جبل کی کٹائی سے لیکر ہر جگہ سندھ برائے فروخت کے بورڈ لگا رکھے ہیں۔بجلی گیس تیل کوئلہ سمیت قدرتی وسائل پرپہلا حق سندھ کے عوام کو جوان کا آئینی حق ہے ۔صوبائی امیرنے کہاکہ اسلام آباد میں پچاس مساجد مدارس کو شہید کرنے کا فیصلہ اورراتورات مدنی مسجد کو شہید کرنا ظلم اورعذاب الہٰی کو دعوت دینے کے مترادف ہے۔اس موقعی پر صوبائی نائب امیر پروفیسر نظام الدین میمن، قیم صوبہ محمد یوسف، نائب قیمین مولانا حزب اللہ جکھرو اور امداداللہ بجارانی بھی ساتھ موجود تھے۔ اجلاس میں کارکردگی رپورٹ ، بدامنی مہنگائی عوامی کمیٹیوں کا قیام سمیت دیگر دعوتی و تنظیمی امور کا جائزہ لیا گیا۔#