ڏوڪري ۾ فش هيچري کاتي جي ڊپٽي ڊائريڪٽر خلاف احتجاجي مظاهرو

مير جروار، رڪ سنڌي، سهڻو سنڌي، توفيق علي جروار،ڪائونسلر رفيق احمد جروار ۽ ٻين احتجاج ڪيو

ڏوڪري (اطهر ميمڻ) ڏوڪريءَ ۾ فش هيچري کاتي جي ڪچن ملازمن اداري جي ڊپٽي ڊائريڪٽر جي مبينا ڪرپشن ۽ مقامي ڪچن ملازمن کي ڪڍي ٻاهريان ملازم رکڻ واري عمل خلاف احتجاجي ڪئمپ قائم ڪري ورتي،اداري ۾ ڊپٽي ڊائريڪٽر ڪرپشن جا رڪارڊ قائم ڪري ورتا آهن، ڳوٺاڻن جو الزام، احتجاج جي اڳواڻي ڪندڙ مير جروار، رڪ سنڌي، سهڻو سنڌي، توفيق علي جروار،ڪائونسلر رفيق احمد جروار، ڪامريڊ ظفر شيخ ۽ ٻين ميڊيا جي نمائندن اڳيان الزام مڙهيندي چيو ته ڪارپ فش هيچري ڏوڪريءَ جو ڊپٽي ڊائريڪٽر اياز علي جوڻيجو، اداري کي تباھ ۽ برباد ڪري ڇڏيو آهي، جنهن اداري اندر ڪرپشن جا رڪارڊ قائم ڪيا آهن، هنن وڌيڪ الزام مڙهيو ته فش هيچريءَ جون گاڏيون سالن کان خراب حالت ۾ بيٺل آهن، پر ڊپٽي ڊائريڪٽر انهن گاڏين جي مرمت جي نالي تي بجيٽ جا پئسا هڙپ ڪري رهيو آهي، مڇين جي افزائش جي نالي تي رڳو پئسا هڙپ ڪيا ويا آهن جڏهن ته ادارو مڪمل طور تي غير فعال بڻجي ويو آهي.. احتجاج ڪندڙن الزام مڙهيو ته ڊپٽي ڊائريڪٽر فش هيچريءَ جي مقامي ڪچن ملازمن کي ڪڍي ٻاهريان ملازم پڻ رکي ڇڏيا آهن جيڪي ڊيوٽي ڪرڻ ئي نه ٿا اچن ۽ ڊپٽي ڊائريڪٽر سندن پگهارون کائي رهيو آهي، احتجاج ڪندڙن اعليٰ اختيارين کان مطالبو ڪيو ته ڊپٽي ڊائريڪٽر اياز جوڻيجو کي هٽائي ايماندار آفيسر مقرر ڪري اداري کي بچايو وڃي ۽ ڊپٽي ڊائريڪٽر خلاف ڪرپشن جي شفاف جاچ ڪرائي وڃي ۽ مقامي ملازمن کي مستقل ڪري سندن روزگار فراهم ڪيو وڃي ۽ ٻاهرين ماڻهن کي نيڪالي ڏئي مقامي ماڻهن کي اداري ۾ رکيو وڃي، هوڏانهن رابطو ڪرڻ تي ڊپٽي ڊائريڪٽر اياز علي جوڻيجو ٻڌايو ته مون مٿان ڪرپشن جا الزام بي بنياد آهن.