اسرائيل عالمي امن لاءِ وڏو خطرو آھي. اسرائيلي دھشتگردي ۾ ھزارين معصوم ماڻھو شھيد ٿيا: اياز لطيف پليجو

اياز لطيف پليجي مختلف اسپتالن ۾ آغا روشنا پٺاڻ، منظور سمون ۽ پارٽي اڳواڻ رمضان رند جي نياڻي جي عيادت ڪئي

حيدرآباد (بيورو)قومي عوامي تحريڪ جي سربراھ اياز لطيف پليجي حيدرآباد ۾ حاجياڻي اسپتال پھچي سنڌي گرلس اسٽوڊنٽس تحريڪ جي مرڪزي جنرل سيڪريٽري آغا روشنا پٺاڻ، پنگريو حادثي ۾ زخمي ٿيل قومي عوامي تحريڪ جي اڳواڻ رمضان رند جي نياڻي جي ھاشمي اسپتال حيدرآباد ۽ سول اسپتال حيدرآباد ۾ منظور سمون جي عيادت ڪئي. ان موقعي تي قومي عوامي تحريڪ جا اڳواڻ ايڊووڪيٽ زاھد ڀنڀرو، نظير بليدي ۽ ربڏنو ملڪ گڏ ھئا.ھوڏانھن قومي عوامي تحريڪ جي سربراھ اياز لطيف پليجي چيو آهي تہ اسرائيل عالمي امن لاءِ وڏو خطرو آھي. اسرائيلي دھشتگردي ۾ ھزارين معصوم ماڻھو شھيد ٿيا آھن. معصوم ماڻھن جو قتل عام روڪڻ ۽ عالمي امن لاءِ سڀني ملڪن کي اسرائيلي جارحيت روڪڻ لاءِ عملي ڪردار ادا ڪرڻو پوندو. اياز لطيف پليجي چيو تہ اسرائيل دنيا کي جنگ جي باھ ۾ اڇلائي رھيو آھي. اسرائيلي جارحيت انسانيت خلاف آھي. دنيا کي جنگ نہ امن جي ضرورت آھي. آمريڪا ۽ برطانيا اسرائيلي جارحيت کي ھٿي ڏئي عالمي امن جي خلاف ڪم ڪري رھيا آھن. اياز لطيف پليجي چيو تہ عالمي طاقتون امن لاءِ ڪردار ادا ڪن. اقوام متحده خاموشي ٽوڙي. اسلامي ملڪ اڳتي اچن.آمريڪا، برطانيه ۽ اسرائيل جي جنگي جنون کي نہ روڪيو ويو تہ تمام وڏو انساني الميو جنم وٺي سگھي ٿو. اياز لطيف پليجي چيو تہ اسرائيل فلسطين ۾ ظلم جي انتھا ڪري ڇڏي آھي. سڄي جنگ مسلمان ملڪن جي وسيلن تي قبضي لاءِ آھي. اياز لطيف پليجي چيو تہ پاڪستان جا حڪمران آئي ايم ايف جي ھدايت تي غريب دشمن معاشي پاليسيون جوڙي رھيا آھن. مھانگائي عوام جي چيلھ چٻي ڪري ڇڏي آھي. سنڌ ۾ سرڪاري اسپتالون ڪرپشن جي ڪمائي جو وڏو ذريعو بڻيل آھن. تعليمي نظام درھم برھم آھي. اياز لطيف پليجي چيو تہ ڪارپوريٽ فارمنگ ۽ ڪئنال سنڌ دشمن منصوبا آھن، ڪنھن بہ ريت زمينن تي قبضا ۽ درياھ تي ڌاڙا برداشت نہ ڪيا ويندا.