ملير: ميمڻ ڳوٺ ٿاڻي جي حد ۾ سپر هاءِ وي تي 3 کدڙا فقير بيدردي سان قتل

اطلاع تي پوليس پهچي عيني، اسما ۽ ثمينا جا لاش تحويل ۾ وٺي اسپتال منتقل ڪري ڇڏيا

ملير (رپورٽ: عبدالرشيد مورجھريو) ميمڻ گوٺ ٿاڻي جي حدن ۾ سپر هاءِ وي ويجهو نامعلوم هٿياربندن فائرنگ ڪري ٽي کدڙن فقيرن کي قتل ڪري ڇڏيو اوچتو گوليون هلڻ سبب علائقي ۾ خوف ۽ دهشت پکڙجي وئي. پوليس موجب ٽنهي جا لاش هڪٻئي کان ڪجهه قدمن تي پٽ تي پيل هئا جن ويجهو کان نشانو بڻايو ويو هو اطلاع ملندي ئي پوليس وڏي انگ ۾ پهتي ۽ شاهديون گڏ ڪرڻ بعد لاش ضابطي جي ڪارروائي لاءِ اسپتال منتقل ڪيا ذريعن موجب رات دير سان علائقي واسين گولين جي آواز ٻڌي واقعي واري هنڌ پهتا ته ٽئي خواجه سرا زمين تي ڪري چڪا هئا، جڏهن ته حملي آور فرار ٿي ويا ايس ايس پي ملير عبدالخالق پيرزادو ميڊيا کي ٻڌايو ته ٻن خواجه سرائن کي سينن ۾ ۽ هڪ کي مٿي ۾ گولي لڳي، ٽنهي کي هڪ هڪ گولي ماري وئي هئي. واقعي واري هنڌ تان 9 ايم ايم پسٽول جا ٻه خول مليا. هن ٻڌايو ته واقعي واري هنڌ کان پرس، ٽيشو ۽ ڪجهه ٻيون شيون به مليون آهن پر مقتولن جي سڃاڻپ تڏهن نه ٿي هئي بعد ۾ پوليس مقتول خواجه سرائن جي سڃاڻپ ڪري ورتي. فوتي عيني، اسما ۽ سمينه بلاول گوٺ ۽ صفورہ جي علائقن ۾ رهائش پذير هيون. واقعي کان پوءِ خواجه سرا ڪميونٽي ۽ مقامي سماجي تنظيمون وڏي غم ۽ غصي جو اظهار ڪندي حڪومت کان مطالبو ڪيو ته جوابدارن کي فوري گرفتار ڪري انصاف ڏنو وڃي.