جنگشاھي ۾ ضمني چونڊ ۾ پيپلز پارٽي اميدوار جي ڪاميابي

32 views | 24th Sep 2025 • سنڌي خبرون

وائيس چيئرمين جو اميدوار انجنيئر مقصود سومرو ڪامياب

جنگشاھي ۾ ضمني چونڊ ۾ پيپلز پارٽي اميدوار جي ڪاميابي

ٺٽو ( شفيق ڀٽي)يونين ڪائونسل جنگشاھي جي وائيس چيئرمين جي خالي ٿيل سيٽ تي ٿيل ضمني چونڊ ۾ پاڪستان پيپلز پارٽي جي اميدوار، حاجي عبدالرحمان سومرو جي فرزند انجنيئر مقصود سومرو غير حتمي غير سرڪاري نتيجن مطابق شاندار ڪاميابي ماڻي ورتي. انتخابي نتيجن موجب انجنيئر مقصود سومرو ڇهن پولنگ اسٽيشنن تان ڪل 1280 ووٽ حاصل ڪري ڪامياب ٿيا، جڏهن ته آزاد اميدوار نواز 269 ۽ ملڪ وقاص 245 ووٽ حاصل ڪري ٻئي ۽ ٽئين نمبر تي رهيا. ڪاميابي جو اعلان ٿيندي ئي علائقي ۾ خوشي وارو ماحول پيدا ٿي ويو، وڏي تعداد ۾ ماڻهن پيپلز پارٽي ٺٽو جي ضلعي صدر ۽ قومي اسيمبلي ميمبر صادق علي ميمڻ جي اوطاق تي پهچي مبارڪون ڏنيون ۽ جشن ملهايو. ان موقعي تي خطاب ڪندي صادق علي ميمڻ چيو ته “هيء ڪاميابي عوام جي ڀروسي ۽ شهيدن جي قربانين جو نتيجو آهي، اسان ايمانداري ۽ سچائي سان علائقي جي خدمت جاري رکنداسين، جڏهن ته ترقياتي منصوبا تيزيءَ سان مڪمل ڪيا ويندا.” انجنيئر مقصود سومرو به عوام جي اعتماد تي سندن ڀرپور شڪريو ادا ڪيو ۽ عزم ڪيو ته هو جنگشاھي ۾ تعليم، صاف پاڻي ۽ روڊن جي بهتري لاءِ پنهنجون سڀ ڪوششون وقف ڪندو