اورکزئی آپریشن میں لیفٹیننٹ کرنل اور میجر سمیت 11 جوان شہید، بھارتی حمایت یافتہ 19 دہشتگرد ہلاک

راولپنڈی (ویب ڈیسک) اورکزئی میں سیکیورٹی فورسز کے آپریشن کے دوران لیفٹیننٹ کرنل اور سیکنڈ ان کمانڈ میجر سمیت 11 جوان شہید ہو گئے، جبکہ فورسز کی جوابی کارروائی میں 19 غیر ملکی دہشتگرد مارے گئے۔ پاک فوج کے ترجمان ادارے آئی ایس پی آر کے مطابق، یہ انٹیلیجنس بیسڈ آپریشن 7 اور 8 اکتوبر کی درمیانی رات کو کیا گیا۔ آپریشن کے دوران دہشتگردوں سے لڑتے ہوئے 11 جوانوں نے اپنی جانوں کا نذرانہ پیش کیا۔ آئی ایس پی آر کا کہنا ہے کہ دہشتگردوں سے فائرنگ کے تبادلے میں شہید ہونے والوں میں لیفٹیننٹ کرنل اور ایک سیکنڈ ان کمانڈ میجر شامل ہیں۔ ترجمان کے مطابق، یہ کارروائی بھارتی پراکسی فتنے "الخوارج" کے ٹھکانے پر کی گئی، جس دوران فورسز نے مؤثر کارروائی کرتے ہوئے 19 بھارتی حمایت یافتہ دہشتگردوں کو جہنم واصل کیا۔ آئی ایس پی آر کے مطابق، لیفٹیننٹ کرنل جنید طارق فرنٹ لائن سے ٹیم کی قیادت کر رہے تھے، جبکہ سیکنڈ ان کمانڈ میجر طیب راحت بھی شہید ہو گئے۔ دیگر شہداء میں نائب صوبیدار اعظم گل، نائیک عدیل حسین، نائیک گل امیر، لانس نائیک شیر خان، لانس نائیک طالش فراز، لانس نائیک ارشاد حسین، سپاہی طفیل خان، سپاہی عاقب علی اور سپاہی محمد زاہد شامل ہیں۔ آئی ایس پی آر کا کہنا ہے کہ اورکزئی کے علاقے میں کلیئرنس آپریشن جاری ہے، پاکستانی فورسز بھارتی سرپرستی میں جاری دہشتگردی کے خاتمے کے لیے پرعزم ہیں، اور شہداء کی قربانیاں دہشتگردی کے خلاف قومی عزم کو مزید مضبوط کرتی ہیں۔