نوشهروفيروز ۾ 27هين ترميم خلاف سنڌ ايڪشن ڪاميٽي ۽ قومي ڌرين پاران احتجاجي ريلي

27هين آئيني ترميم ۽ صوبي کي يونٽن ۾ ورهائڻ جي منصوبي خلاف الله واري چونڪ کان پريس ڪلب تائين ريلي ڪڍي وئي

نوشهروفيروز (ڊ.ر) سنڌ ايڪشن ڪاميٽي ۽ قومي ڌرين پاران ملڪ ۾ تجويز ڪيل 27هين آئيني ترميم ۽ سنڌ صوبي کي يونٽن ۾ ورهائڻ جي منصوبي خلاف الله واري چونڪ کان پريس ڪلب تائين احتجاجي ريلي ڪڍي وئي، جنهن ۾ سياسي ۽ قومي تنظيمن جي اڳواڻن وڏي تعداد ۾ شرڪت ڪئي.ريلي جي اڳواڻي جيئي سنڌ قومي محاذ جي مرڪزي آرگنائيزر ڊاڪٽر نياز ڪالاڻي، پنھل ساريو، ايس يو پي جي مرڪزي اڳواڻ مجيب ماڇي، ڊويزنل صدر ڄام اسلم ڪوريجو، رضا محمد بهڻ، جسقم (ٻ) جي امتياز کوسو، اياز راڄپر، عرفان ڏاهري، سرمد آزاد، شيراز حسين، مهر علي وسطڙو، خادم سيال ۽ ٻين ڪئي. ريلي شهر جي مختلف رستن تان ٿيندي پريس ڪلب پهتي، جتي اڳواڻن خطاب ڪندي چيو ته حڪمران ملڪ ۽ قومن خلاف سازشون ڪري رهيا آهن، ۽ 27هين ترميم ذريعي سنڌ کي يونٽن ۾ ورهائڻ جي ڪوشش مڪمل طور تي ناقابلِ قبول آهي. ڊاڪٽر نياز ڪالاڻي چيو ته سنڌ جي وحدت ۽ وسيلا ڪنهن صورت ٽوڙڻ نه ڏينداسين. هن چيو ته حڪمران زرداري مافيا جي چوڻ تي اهڙا فيصلا ڪري رهيا آهن، جيڪي سنڌ جي عوام لاءِ خطرناڪ آهن. پنھل ساريو چيو ته حڪمران پنھنجي ڪرپشن لڪائڻ لاءِ آئين سان کيڏائي رهيا آهن، جيڪي ڪالهه سينيٽ ۾ دفن ڪيا ويا، سي هاڻي قومي اسيمبلي ۾ دفن ٿيڻ وارا آهن.اسلم ڪوريجو، مجيب ماڇي، عرفان ڏاهري، رضا بهڻ ۽ ٻين چيو ته 17 سال وسيلن جي لوٽ مار کان پوءِ به حڪمرانن جا پيٽ ناهن ڀريا، هاڻي وري سنڌ جي ورهاست جو خواب ڏسي رهيا آهن، جيڪو ڪڏهن به پورو نه ٿيندو. اڳواڻن واضح ڪيو ته جيڪڏهن 27هين ترميم واپس نه ورتي وئي ته سنڌ جا ماڻهو رستن تي نڪرندا، روڊن، ريلوي ٽريڪن ۽ پنجاب ڏانهن ويندڙ اهم رستن کي بند ڪري احتجاج جو دائرو وڌائيندا.هنن چيو ته سنڌي قوم پنهنجي ڌرتيءَ جي حفاظت ڪرڻ ڄاڻي ٿي، ۽ ڪوبه سنڌ دشمن فيصلو قبول نه ڪيو ويندو. ريلي پريس ڪلب اڳيان اختتام پذير ٿي، جتي قومي نعرا هڻيا ويا ۽ سنڌ جي وحدت لاءِ جدوجهد جاري رکڻ جو عهد ورجايو ويو۔