گڏاپ جي روزي گوندر ڳوٺ جو پرائمري اسڪول استاد مقرر نه ٿيڻ ڪري بند پيل

اسڪول ۾ مقرر استاد رٽائرڊ ٿي ويو، ٽي مهينا گذرڻ باوجود استاد مقرر نٿو ڪيو وڃي: ڳوٺاڻا

ملير (رپورٽ: عبدالرشيد مورجھريو)گڏاپ ٽائون جي روزي گوندر ڳوٺ جو پرائمري اسڪول ٽن مهينن کان بند پيل، سوين ٻارڙا تعليم کان محروم ٿي ويا آهن۔ ٽي مهينا گذرڻ باوجود تعليم کاتي ملير جا آفيسر اسڪول لاءِ نئون استاد مقرر ڪرڻ ۾ ناڪام رهيا آهن۔تفصيل موجب ملير جي قديمي ڳوٺ روزي گوندر جي گورنمينٽ پرائمري اسڪول ۾ ٽن مهينن کان تعليم جو سلسلو مڪمل طور تي بند پيل آهي۔ اسڪول جو اڳوڻو استاد ٽي مهينا اڳ رٽائر ٿيو هو، جنهن کان پوءِ تعليم کاتي پاران اڃا تائين نئون استاد مقرر نه ڪيو ويو آهي، جنهن سبب اسڪول کي تالا لڳل آهن ۽ ڳوٺ سميت آس پاس جي علائقن جا سوين معصوم ٻارڙا تعليم کان محروم ٿي ويٺا آهن ڳوٺ واسين جو چوڻ آهي ته روزي گوندر ڳوٺ ۽ ڀرپاسي ۾ ٻارن لاءِ اهو ئي هڪ سرڪاري تعليمي ادارو آهي، جيڪو بند هجڻ سبب والدين سخت پريشاني ۾ مبتلا آهن۔ والدين چيو ته معصوم ٻارڙا روز اسڪول وڃڻ لاءِ تيار ٿين ٿا، پر بند دروازو ڏسي مايوس ٿي موٽي وڃن ٿا ڳوٺاڻن تعليم کاتي ملير جي آفيسرن کان مطالبو ڪيو آهي ته فوري طور تي گورنمينٽ پرائمري اسڪول روزي گوندر ڳوٺ ۾ نئون استاد مقرر ڪيو وڃي، جيئن علائقي جي ٻارن جو تعليمي مستقبل بچي سگهي ۽ انهن کي ٻيهر تعليم حاصل ڪرڻ جو موقعو ملي عوامي حلقن پڻ ضلعي انتظاميا ۽ صوبائي وزيرِ تعليم کان نوٽيس وٺڻ جو مطالبو ڪيو آهي ته ڳوٺ ۾ تعليم جو سلسلو ٻيهر بحال ڪيو وڃي ۽ لاپرواهي جا ذميوار آفيسر جوابده بڻايا وڃن۔