شاهه لطيف پوليس پاران هڪ ڪروڙ جي ڦر ۾ ملوث مئنيجر سميت 4جوابدارن کي گرفتار ڪرڻ جي دعويٰ

گرفتار جوابدارن وٽان 54 لک رپيا روڪ، ٻه پستول ۽ پنج موبائل فون هٿ ڪيا ويا آهن: ايس ايس پي ملير عبدالخالق پيرزادو

ملير (رپورٽ: عبدالرشيد مورجھريو)شاهه لطيف ٽائون پوليس وڏي ڪارروائي ڪندي پنهنجي ئي مالڪ کان هڪ ڪروڙ رپين جي ڦرلٽ ۾ ملوث مينيجر سميت چار جوابدارن کي گرفتار ڪري ورتو آهي ايس ايس پي ملير عبدالخالق پيرزادو موجب گرفتار جوابدارن وٽان 54 لک رپيا نقد، ٻه پستول ۽ پنج موبائل فون هٿ ڪيا ويا آهن ايس ايس پي ملير ٻڌايو ته مرڪزي جوابدار عبدالمنان پولٽري فارم جي مالڪ جو مينيجر هو ۽ عادي ڏوهاري آهي، جيڪو اڳ به ٻه ڀيرا گرفتار ٿي چڪو آهي عبدالمنان اسٽريٽ ڪرمنلز سان گڏجي نئون گينگ ٺاهيو ۽ پنهنجي ئي مالڪ کي ڦرڻ جي رٿابندي ڪئي پوليس موجب جوابدار ڦر جي رقم مان 30 لک رپيا ملير جيل جي رهائشي ڪالوني ۾ لڪائي رکيا هئا، جيڪي پڻ برآمد ڪيا ويا آهن گرفتار جوابدارن ۾ هڪ اڳوڻي جيل پوليس اهلڪار جو پٽ به شامل آهي گرفتار جوابدارن ۾ عبدالمنان، ساجد عرف چوچي، حسن ۽ عبداللطيف شامل آهن، جن کان وڌيڪ جاچ جاري آهي، جڏهن ته واقعي ۾ ملوث ٻين ساٿين جي گرفتاري لاءِ ڇاپا هنيا پيا وڃن