عمرڪوٽ ضلعي ۾ ڪڻڪ جو اٽو مهانگو، غريب پريشان

ڪنري سميت سموري ضلعي ۾ ڪڻڪ جو اٽو في مڻ 5 هزار رپين ۾ وڪامڻ لڳو

عمرڪوٽ(رپورٽ:ڪانجي مل رکيسر)ڪنري تعلقي سميت عمرڪوٽ ضلعي ۾ ڪڻڪ جو اٽو 5 هزار روپيا في مڻ وڪامجڻ لڳو آھي، اوپن مارڪيٽ ۾ ڪڻڪ 44 سئو روپيا في مڻ وڪرو ٿيڻ سبب اٽو 120 روپيا ڪلو ۽ 48 سئو کان 5 هزار في مڻ وڪرو ٿيڻ لڳو آھي جنھن سبب غريب ۽ ڏھاڙيدار طبقو ٻن ويلن جي ماني لاءِ پريشان بڻيل آھي، پورهيتن ۽ شھرين گُل محمد، شفيع، ڀرت ڪمار، حبيب الله، ڀيرو ڪولھي، جيوڻ ساگر ۽ ٻين جو چوڻ آھي ته سنڌ سرڪار ڪڻڪ جو اگھ مقرر ڪري گم ٿي وئي آھي اٽو 5 هزار مڻ خريد ڪريون پيا ملندڙ اجرت گھٽ ۽ مھانگائي وڌيڪ آھي جنھن سبب سخت مشڪلاتن جو شڪار آھيون، هنن چيو تہ اٽي جي اگھن ۾ ڳاٽي ٽوڙ واڌ سخت ڏکيائن ۾ مبتلا ڪري ڇڏيو آھي، غريب ماڻھو ٻه ويلا ٽارڻ لاءِ به پريشان ٿي ويو آھي، مھانگائي عوام جي چيلھ چٻي ڪري ڇڏي آھي. 500 روپيا ڏھاڙي ڪمائيندڙ پورھيت پنھنجي گھر جي ڪيون، بيماري جي ڪيون يا اٽي جي ڪيون، ھلندڙ حالاتن زندگي جي سمورين خوشين کان محروم ڪري ڇڏيا آھن هنن مطالبو ڪندي گهر ڪئي تہ سنڌ سرڪار پاليسي جوڙي چڪي مالڪن کي جلد کان جلد ڪوٽا فراھم ڪرڻ سان گڏ اٽي جا مناسب اگھ مقرر ڪيا وڃن.