ملير ۾ وڌندڙ بدامني جي حوالي سان عوامي پريس ڪلب جي وفد جي ايس ايس پي سان ملاقات

شاهه لطيف، اسٽيل ٽائون، ميمڻ ڳوٺ، ملير سٽي ۽ گڏاپ جي حدن ۾ امن امان جي صورتحال خراب آهي: صحافي

ملير (رپورٽ: عبدالرشيد مورجھريو)عوامي پريس ڪلب ملير جي وفد جنرل سيڪريٽري سيد عنايت علي شاهه، سامي ميمڻ، سيد سجاد علي شاهه ۽ طارق سهتو ايس ايس پي ملير ڊاڪٽر عبدالخالق پيرزادي سان ملاقات ڪئي، جنهن دوران ملير ۾ امن امان جي خراب صورتحال ۽ خاص طور عوامي پريس ڪلب ملير جي صحافين کان ڦر جي واقعن جي ڄاڻ ڏني وفد ايس ايس پي ملير کي آگاهه ڪيو ته ضلعي ملير جي 11 ٿاڻن، خاص طور شاهه لطيف، اسٽيل ٽائون، ميمڻ ڳوٺ، ملير سٽي ۽ گڏاپ جي حدن ۾ امن امان جي صورتحال انتهائي خراب ٿي چڪي آهي، جتي ڦرون ۽ ڌڙا روز جو معمول بڻجي ويا آهن وفد عوامي پريس ڪلب ملير سان لاڳاپيل صحافين طارق سهتو، سجاد علي شاهه، غلام علي گوندر، اعجاز شيخ ۽ لياقت سمون سان مٿي ڄاڻايل ٿاڻن جي حدن اندر موبائل فون روڪ رقم ۽ موٽرسائيڪلون ڦر ڪيون ويون آهن جنهن سبب صحافين ۾ سخت بيچيني پکڙيل آهي وفد زور ڀريو ته امن امان جي صورتحال کي بهتر بڻايو وڃي، صحافي سجاد علي شاهه جي چوري ٿيل موٽرسائيڪل سميت ٻين صحافين کان ڦر ڪيل سامان جي واپسي کي يقيني بڻايو وڃي ۽ ڦرن ۾ ملوث ڏوهارين خلاف سخت ڪارروائي ڪئي وڃي ان موقعي تي ايس ايس پي ملير ڊاڪٽر عبدالخالق پيرزادو چيو ته ضلعي ۾ مجموعي طور امن امان جي صورتحال اڳ جي ڀيٽ ۾ بهتر آهي ھن صحافين کان ڦر وارن واقعن جو سختي سان نوٽس ورتو ۽ واضح ڪيو ته ھر حال ۾ صحافين جو تحفظ ڪيو ويندو ھن وڌيڪ چيو ته پوليس ڏوهارين ۽ ڦورن خلاف ڪارروائين ۾ مصروف آهي، جنهن دوران ڪيترائي گهربل ڏوهاري گرفتار ڪيا ويا آهن. هن صحافين جي وفد کي يقين ڏياريو ته سندن شڪايتن جو جلد ازالو ڪيو ويندو ۽ ايندڙ ڪجهه ڏينهن ۾ ٻيهر گڏجاڻي ڪوٺائي ويندي، جنهن ۾ ڊي ايس پي ۽ لاڳاپيل ايس ايچ اوز کي پڻ طلب ڪيو ويندو