ڏوڪري ۾ بدامني تي ضابطو نه آيو، چور ٻن ميڊيڪل اسٽورن مان چوري ڪري فرار

تعلقي اسپتال سامهون صحافي معشوق ڏيرو جي علي ميڊيڪل اسٽور ۽ سلطان ميڊيڪل اسٽور مان چوري

ڏوڪري (رپورٽر) ڏوڪري ۾ بدامني عروج تي پهچي وئي، شھري عدم تحفظ جو شڪار ٿيڻ ڪري پريشاني ۾ مبتلا ٿي ويا. گذريل 7 ڏينھن دوران 15 کان وڌيڪ شھري توڙي دوڪاندار چورين ۽ ڦرن سبب پنھنجا پئسا، موبائيل فونز ۽ سامان کان محروم بڻجي ويا. ٻئي طرف تعلقہ اسپتال جي سامهون صحافي معشوق ڏيرو جي علي ميڊيڪل اسٽور ۽ سلطان ميڊيڪل اسٽور مان نامعلوم چورن ڇت جون سرون پٽي لکين روپيا روڪ ء دوائون چوري ڪري فرار ٿي ويا. مليل معلومات موجب نامعلوم چورن اسٽور جي ڇتن جو سرون پٽي علي ميڊيڪل اسٽور مان 2 لک 80 هزار ۽ سلطان ميڊيڪل اسٽور مان 60 هزار روپيا رقم ۽ دوائون چوري ڪري فرار ٿي ويا. ان موقعي تي علي ميڊيڪل اسٽور جي مالڪ صحافي معشوق ڏيرو، سلطان علي صحافين سان ڳالھائيندي چيو ته ڏوڪري پوليس امن امان جي صورتحال بهتر نه ڪري سگهي آهي، ڏوھ روز جو معمول بڻجي ويا آهن. ھنن مطالبو ڪيو ته اسٽورن مان ٿيل چوري جي رقم واپس ڪرائي تحفظ فراھم ڪيو وڃي.