پپري جي قديمي ڳوٺن ۾ سيوريج نظام تباهه حال بڻيل

روڊ رستا ۽ گهٽيون گندگي جي ور چڙهيل، گٽر نالا اٿليل

ملير (رپورٽ: عبدالرشيد مورجھريو) پپري يوسي جي رهواسين شڪايت ڪئي آهي ته قديمي ڳوٺن ۾ گٽرن جي حالت خراب آهي، سيوريج لائينون تباهه ٿي چڪيون آهن ۽ ڪيترن ئي هنڌن تي مين هولن جا ڊڪڻ به غائب آهن، جنهن سبب رهواسين کي آمد و رفت ۾ سخت ڏکيائي پيش اچي رهي آهي۔ علائقي واسين موجب صفائي جي باقاعده نگراني نه ٿيڻ ڪري گٽرن مان نيڪال وارو پاڻي وهڻ لڳو آهي، جڏهن ته صفائي عملو غائب آهي۔رهواسين جو چوڻ آهي ته ٽي ايم سي گڏاپ ۽ سينيٽيشن کاتو مڪمل طور نااهل ثابت ٿيو آهي سندن الزام آهي ته سينيٽيشن جو ڊائريڪٽر صفائي لاءِ جاري ڪيل فنڊن ۾ مبينا بي ضابطگيون ڪري رهيو آهي ۽ صورتحال بابت پڇڻ وارو ڪو نٿو هجي، جنهن سبب علائقي ۾ صفائي جو نظام مڪمل طور تي درهم برهم ٿي چڪو آهي۔علائقي واسين مطالبو ڪيو آهي ته ڊي سي ملير گٽرن بابت نوٽيس ته ورتو آهي، پر پپري جي ڳوٺن ۾ عملي تبديلي نظر نٿي اچي۔ شڪايت ڪندڙن پيپلزپارٽي ملير جي قيادت، خاص طور تي پي ايس-85 جي صدر يار محمد بلوچ کان اپيل ڪئي آهي ته هو فوري نوٽيس وٺي پپري جي قديمي ڳوٺن ۾ صفائي ۽ سيوريج جي صورتحال کي بهتر بڻائڻ لاءِ قدم کڻن۔