ڏوڪري ۾ خلع لاءِ عدالت ۾ درخواست داخل ڪرائيندڙ ناري جو احتجاج

مڙس نشئي آ جيڪو مسلس تشدد ڪندو هو جنهن ڪري عدالت جو در کڙڪايو: ثمينا ڳچل

ڏوڪري (رپورٽر) ڏوڪريءَ ۾ طلاق لاءِ ڪورٽ ۾ ڪيس داخل ڪندڙ عورت ثمينه ڳچل صحافين آڏو دانهن ڪندي چيو آهي ته مٿس تشدد ڪندڙ نشئي مڙس کان الڳ ٿيڻ لاءِ داخل ڪيل طلاق جي ڪيس تان هٿ کڻائڻ لاءِ مٿس زبردستي دٻاءُ وڌو پيو وڃي ۽ شديد ذهني تڪليف ڏني پئي وڃي. هن الزام هنيو ته بااثر ماڻهن جي مداخلت سبب نه رڳو کيس ڌمڪيون مليون آهن پر سندس پيرسن ۽ بيمار پيءُ کي پڻ پوليس ذريعي دٻاءُ هيٺ آندو ويو آهي ته جيئن هوءَ قانوني جدوجهد کان پوئتي هٽي وڃي.ڳوٺ ٻڍي واهن جي رهواسڻ ثمينه ڳچل هنيو آهي ته سندس مڙس انيس مشوري نشي جو عادي آهي، جيڪو باقاعدي طور مٿس تشدد ڪندو رهيو آهي. متاثر عورت موجب سندس شاديءَ کي هڪ سال جو عرصو گذريو آهي پر شادي کان وٺي هن سخت ذهني ۽ جسماني تڪليفن ۾ زندگي گذاريو آهي، جنهن بعد هن قانوني طريقي سان ڪورٽ ۾ طلاق جو ڪيس داخل ڪيو آهي. ثمينه ڳچل جو چوڻ آهي ته طلاق جي ڪيس کان پوءِ ڪجهه بااثر ماڻهن کيس دٻاءُ هيٺ آڻڻ شروع ڪيو آهي ته هوءَ ڪيس تان هٿ کڻي. هن ٻڌايو ته انهن ماڻهن جي نالن جو ذڪر ڪرڻ کان به هوءَ خوفزده آهي، جڏهن ته بااثر ڌرين جي چوڻ تي پوليس سندس پيرسن ۽ بيمار پيءُ محرم علي ڳچل کي ٿاڻي تي کڻي وئي، جتي کيس گهڻي دير تائين زمين تي ويهاري ذهني دٻاءُ وڌو ويو ته طلاق واري ڪيس تان هٿ کنيو وڃي. متاثر عورت موجب هن پوليس کي اهو چئي پنهنجي پيءُ کي ڇڏايو آهي ته هوءَ پاڻ بااثر ماڻهن سان وڃي ڳالهه ٻولهه ڪندي، پر هن جو چوڻ آهي ته هوءَ غريب ۽ لاچار آهي ۽ اهڙو دٻاءُ برداشت ڪرڻ جي سگهه نٿي رکي. هن چيو ته سندس پيءُ پوڙهو ۽ بيمار آهي، جيڪڏهن اهڙي ذهني پريشر سبب کيس ڪجهه ٿي ويو ته ان جو ذميوار ڪير هوندو؟ثمينه ڳچل وڌيڪ ٻڌايو ته ڪورٽ ۾ طلاق جو ڪيس هلندڙ آهي، جنهن جي هڪ پيشي ٿي چڪي آهي، پر سندس مڙس عدالت ۾ پيش نه ٿيو. ٻي پيشي 26 ڊسمبر تي مقرر آهي، جڏهن ته کيس ڌمڪيون پڻ مليون آهن ته جيڪڏهن هوءَ عدالت ۾ پيش ٿي ته کيس قتل ڪيو ويندو.متاثر عورت اعليٰ اختيارين، وس وارن ادارن، انساني حقن جي تنظيمن ۽ ميڊيا کان اپيل ڪئي آهي ته هو سندس دانهن ورنائين، کيس ۽ سندس پيءُ کي تحفظ فراهم ڪيو وڃي ۽ هن تي ٿيندڙ دٻاءُ جو نوٽيس ورتو وڃي ته جيئن هوءَ بغير خوف جي قانوني طريقي سان پنهنجو ڪيس وڙهي سگهي.