هڪ بين الصوبائي گروهه کي گرفتار ڪيو ويو آهي: ايس ايس پي نوشهروفيروز روحل کوسو

سنڌ جي مختلف شهرن ۾ چوري ۽ ڦر جي واقعن ۾ ملوث هڪ بين الصوبائي گروهه کي گرفتار ڪيو ويو آهي

نوشهروفيروز (ڊ ر)نوشهروفيروز ضلعي ۾ ڏوهاري عنصرن خلاف پوليس جي ڪريڪ ڊائون جاري آهي. ان سلسلي ۾ ٽن ڏينهن ۾ ٻي هنگامي پريس ڪانفرنس کي خطاب ڪندي ايس ايس پي نوشهروفيروز مير روحل خان کوسو انڪشاف ڪيو ته نوشهروفيروز، مورو، هالا، دادو ۽ سنڌ جي ٻين شهرن ۾ چوري ۽ ڦر جي واقعن ۾ ملوث هڪ بين الصوبائي گروهه کي گرفتار ڪيو ويو آهي ۽ وڏي مقدار ۾ چوري ٿيل سامان هٿ ڪيو ويو آهي. زخمي حالت ۾ گرفتار جوابدارن ۾ پنجاب جي اوڪاڙه شهر مان عون محمد جٽ ۽ محمد اصغر ڀٽي شامل آهن. ايس ايس پي موجب گرفتار جوابدارن جي قبضي مان مختلف موبائل مارڪيٽن ۽ دڪانن مان چوري ۽ ڦر دوران لُٽيل 165 موبائل فون، جديد هٿيار، واقعن ۾ استعمال ٿيندڙ سامان، گاڏيون ۽ ڪارن لاءِ ريموٽ جمر هٿ ڪيا ويا آهن. بازيابي ثابت ڪري ٿي ته ڄاڻايل گروهه نه رڳو دڪانن جي ڦرن ۾ پر ٻين سنگين ڏوهن ۾ به ملوث رهيو آهي. هن وڌيڪ چيو ته هٿ ڪيل موبائل فونز ۾ 23 جنوري تي نوشهروفيروز شهر ۽ هالا ۾ موبائل شاپ جي ڦرلٽ دوران لُٽيل سامان پڻ شامل آهي. سوالن جي جواب ۾، ايس ايس پي واضح ڪيو ته نوشهروفيروز شهر ۾ ٻئي موبائل شاپ جي ڦرلٽ ۾ ساڳئي گروهه جي ملوث هجڻ جا ثبوت پڻ مليا آهن، جڏهن ته وڌيڪ جاچ کانپوءِ ٻيا چوري ٿيل سامان به هٿ اچڻ جي اميد آهي. آخر ۾، ايس ايس پي مير روحل خان کوسو شهرين کي پوليس تي اعتماد ڪرڻ جي اپيل ڪئي. هن چيو ته سنڌ پوليس کي عوام جي ٽيڪسن مان پگهار ملندي آهي، تنهن ڪري اهو اسان جو فرض آهي ته ماڻهن جي جان ۽ مال جي حفاظت کي يقيني بڻايون. پريس ڪانفرنس دوران، نوشهروفيروز شاپ ڪيپرز ايسوسيئيشن جو اڳواڻ ۽ هڪ معزز شهري ۽ سماجي شخصيت پير خالد سيف الله صحرائي پڻ موجود هو ۽ پوليس جي ڪارڪردگي کي خراج تحسين پيش ڪيو.