ٺٽو ۽ مڪلي ۾ بند پيل آر او فلٽر پلانٽن بابت صوبائي محتسب سنڌ جو سخت نوٽيس

نائب صدر عوامي پريس ڪلب ممتاز علي سميجو جي داخل تي پبلڪ هيلٿ ڊپارٽمينٽ کي نوٽيس جاري

ٺٽو (محمد شفيق ڀٽي)ٺٽو ۽ مڪلي ۾ ڪروڙين روپين جي لاڳت سان تعمير ڪيل آر او فلٽر پلانٽن جي ڊگهي عرصي کان بند هجڻ ۽ بدانتظامي جو صوبائي محتسب سنڌ، ريجنل آفيس ٺٽو سخت نوٽيس ورتو. نائب صدر عوامي پريس ڪلب ٺٽو ممتاز علي سميجو جي داخل ڪيل درخواست تي صوبائي محتسب سنڌ جي ريجنل ڊائريڪٽر ٺٽو، هارون احمد خان پاران پبلڪ هيلٿ انجنيئرنگ ڊپارٽمينٽ ٺٽو کي باضابطه نوٽيس جاري ڪيو ويو آهي. نوٽيس موجب، شڪايت ۾ ڄاڻايو ويو آهي ته مڪلي سميت ضلعي ٺٽي ۾ لڳ ڀڳ 62 آر او فلٽر پلانٽن مان اڪثر مڪمل طور غيرفعال بڻيل آهن، جنهن سبب شهري صاف پيئڻ جي پاڻي جهڙي بنيادي انساني حق کان محروم آهن. شڪايت ۾ خاص طور ڀٽي مسجد ڀرسان ناريجا ڳوٺ مڪلي، درگاھ حضرت شاهه ابراهيم شاهه جيلاني ٺٽو، درگاھ مخدوم آدم نقشبندي ٺٽوي مڪلي ۽ ڳوٺ رسول بخش بروهي مڪلي ۾ قائم آر او فلٽر پلانٽن جي بندش جو ذڪر ڪيو ويو آهي، جيڪي گذريل ڪيترن ئي مهينن ۽ سالن کان بند پيل آهن. صوبائي محتسب سنڌ پاران جاري ڪيل نوٽيس ۾ واسطيدار کاتي کي هدايت ڪئي وئي آهي ته هو 23 فيبروري 2026 تائين پنهنجي تفصيلي رپورٽ پيش ڪري، ٻي صورت ۾ محتسب ايڪٽ 1991 تحت قانوني ڪارروائي عمل ۾ آندي ويندي. نوٽيس ۾ واضح ڪيو ويو آهي ته حڪمن جي نافرماني جي صورت ۾ صوبائي محتسب سنڌ وٽ هاءِ ڪورٽ جي برابر اختيار موجود آهن، جن تحت طلب، جاچ ۽ توهينِ عدالت جي ڪارروائي به ٿي سگهي ٿي. شهرين ۽ سماجي حلقن ريجنل ڊائريڪٽر ٺٽو صوبائي محتسب سنڌ جي هن قدم کي ڀليڪار ڪندي اميد ظاهر ڪئي آهي ته بند پيل آر او فلٽر پلانٽ جلد فعال بڻايا ويندا ۽ ذميوار عملدارن خلاف قانوني قدم کنيا ويندا.