ملير: ميمڻ ڳوٺ جي نجي اسپتال ۾ ويم دوران عورت ۽ ڄاول ٻار جي فوت ٿيڻ واري واقعي جو ڪيس داخل

ملير (رپورٽ: عبدالرشيد مورجھريو)ميمڻ ڳوٺ پوليس نجي اسپتال ۾ ويم دوران عورت ۽ ڄاول ٻار جي فوت ٿيڻ واري واقعي جو نوٽيس وٺندي اسپتال انتظاميه خلاف ڪيس داخل ڪري ڇڏيو آهي، جنهن کي عوامي ۽ سماجي حلقن طرفان خوش آئند قدم قرار ڏنو پيو وڃي.علائقي واسين ۽ سماجي حلقن جو چوڻ آهي ته هاڻي ضروري آهي ته جاچ کي روايتي انداز کان هٽائي شفاف،غيرجانبدار ۽ قانون مطابق مڪمل ڪيو وڃي. مطالبو ڪيو پيو وڃي ته جاچ هيٺ آيل نجي اسپتال جي سمورن قانوني ۽ انتظامي پهلوئن جي تفصيلي جاچ ڪئي وڃي.عوامي حلقن پوليس کان مطالبو ڪيو آهي ته هن معاملي بابت هيٿ ڪيئر ڪميشن ۽ صحت کاتي کي به باضابطه طور تي لکت ۾ آگاهه ڪيو وڃي، جيئن اسپتال جي رجسٽريشن، اجازت نامن ۽ طبي سهولتن بابت سمورا قانوني گهرجون پوريون ڪرايون وڃن.علائقي واسين جو وڌيڪ چوڻ آهي ته جيڪڏهن جاچ ايمانداري ۽سنجيدگي سان ڪئي وئي ته نه رڳو متاثر وارثن کي انصاف ملندو، پر اهڙن واقعن جي ٻيهر ٿيڻ کان به روڪ ٿئي سگهندي. شهرين اميد ظاهر ڪئي آهي ته پوليس هن ڪيس کي منطقي انجام تائين پهچائي انصاف جي هڪ مثال قائم ڪندي.