گڏاپ ٽائون انتظاميا طرفان موئيدان، پٺاڻ ڳوٺ ۾ سولر واٽر سپلائي اسڪيم جو افتتاح

ملير (رپورٽ: عبدالرشيد مورجھريو) گڏاپ ٽائون جي چيئرمين طارق عزيز بلوچ، وائس چيئرمين جام محمد جوکھیو ۽ ميونسپل ڪمشنر محمد نواز مهر يو سي گڏاپ جي علائقي موئيدان پٽاڻ ڳوٺ ۾ سولر سسٽم سان ليس واٽر سپلائي اسڪيم جو افتتاح ڪيو۔افتتاحي تقريب ۾ ڪائونسل ميمبر دانش برفت، سپرنٽنڊنٽ انجنيئر نور علي جمالي، اسسٽنٽ ايگزيڪيوٽو انجنيئر وسيم آرائیں سميت ٻيا آفيسر پڻ شريڪ هئا۔چيئرمين طارق عزيز بلوچ چيو تہ موئيدان ڊگهي عرصي کان صاف پاڻي جي کوٽ کي منهن ڏئي رهيو هو، هن منصوبي سان رهواسين کي مستقل ۽ باعزت پاڻي جي فراهمي يقيني بڻائي وئي آهي۔وائس چيئرمين جام محمد جوکھیو موجب گڏاپ ٽائون شهري ۽ ڳوٺاڻن علائقن کي برابر اهميت ڏئي جديد ٽيڪنالاجي وسيلي سهولتون مهيا ڪري رهيو آهي۔ميونسپل ڪمشنر محمد نواز مهر ٻڌايو تہ اسڪيم مڪمل ٽيڪنيڪي معيار ۽ شفافيت سان مڪمل ڪئي وئي آهي، جڏهن تہ سولر پينلز ذريعي پمپنگ سسٽم بنا رڪاوٽ جاري رهندو ۽ باقاعده نگراني ڪئي ويندي۔تقريب ۾ ڊائريڪٽر پراپرٽي سهيل يار خان، ڊائريڪٽر انفارميشن رضوان صابر ۽ ٻين عملدارن پڻ شرڪت ڪئي۔