رمضان جي آمد سان ملير جي ٻهراڙين ۾ مهانگائي جو طوفان، فروٽ ۽ سبزين جا اگهه ٻيڻا ۽ ٽيڻا

رزاق آباد، ميمڻ ڳوٺ، گهگهر، ابراهيم حيدري ۽ پپري ۾ فروٽ ۽ سبزين جي اگهن ۾ اوچتو ڳاٽي ٽوڙ واڌ

ملير(رپورٽ: عبدالرشيد مورجھريو) رمضان شريف جي آمد سان ملير جي ٻهراڙين رزاق آباد، ميمڻ ڳوٺ، گهگهر، ابراهيم حيدري ۽ پپري ۾ فروٽ ۽ سبزين جي اگهن ۾ اوچتو ڳاٽي ٽوڙ واڌ سبب پورهيت ۽ غريب طبقو سخت پريشاني ۾ مبتلا ٿي ويو آهي شهرين موجب جيڪي ڪيلا ڪجهه ڏينهن اڳ 50 رپيا درزن ملندا هئا، سي هاڻ 250 رپيا درزن تائين پهچي ويا آهن، جڏهن ته 300 رپيا درزن ملندڙ صوف 600 رپين تائين وڪرو ٿي رهيا آهن۔ اهڙي طرح 100 رپيا ملندڙ گدرو 300 رپيا ۽ 100 رپيا ڪلو ملندڙ هنداڻو به 300 رپيا ڪلو ٿي ويو آهي، جنهن سبب پورھيت طبقو سخت پريشان ۾ مبتلا ٿي ويو آھي شهرين اقبال ڪلمتي، مشتاق گبول، نبي بخش شيخ، شيراز گبول ۽ شمشاد شاهه صحافين سان ڳالهائيندي چيو ته رمضان جهڙي برڪتن واري مهيني کان اڳ ئي واپارين طرفان ناجائز منافع خوري جو بازار گرم ڪيو ويو آهي، پر لاڳاپيل انتظاميا مڪمل طور خاموش تماشائي بڻيل آهي هنن افسوس جو اظهار ڪندي چيو ته جيڪڏهن اگهن تي ڪنٽرول نه ڪيو ويو ته ايندڙ ڏينهن ۾ حالتون وڌيڪ خراب ٿي سگهن ٿيون هنن خبردار ڪيو ته جيڪڏهن ضلعي انتظاميا ۽ پرائس ڪنٽرول عملي فوري ڪارروائي نه ڪئي ته مجبور ٿي هو پاڻي تي روزو رکڻ ۽ کولڻ تي مجبور ٿي ويندا، جنهن جي ذميواري انتظاميا تي عائد ٿيندي علائقي واسين اعليٰ اختيارين کان مطالبو ڪيو آهي ته رمضان المبارڪ دوران فروٽ ۽ سبزين جي اگهن تي ڪنٽرول يقيني بڻايو وڃي، پرائس لسٽ تي سختي سان عمل ڪرائي ناجائز منافع خورن خلاف ڪاروائي ڪئي وڃي ته جيئن غريب ۽ پورهيت طبقو سڪون سان روزا رکي سگهي..